Oanehisfilmmat stuorra hámis

Sámi Dáiddaguovddáš nuppástahttá dán geasi dan nuppi čájáhuslanja kino latnjan.  Mis leat ođđa buori stuolut mat biddjojit guhkkálaga vai filbmageahččit eai čohkká menddo lahkalaga, go lávvardaga suoidnemánu 4. beaivvi, tiibmu 18:00 rahpat filbmaprográmma “Oanehisfilmmat stuorra hámis” .

Mii leat bovden Ken Are Bongo (rešissevra/buvttadeaddji/govvideaddji) ja Johan Sara juniora (komponista/musihkkár) ráhkadit oanehisfilbmaprográmma mii bistá 30 minuvtta, ja dat čájehuvvo juohke tiibmabeales.
.
Filmmažat mat čájehuvvojit borgemánu 30. beaivvi rádjai:
.
SEA SÁMI, SEE / Johan Sara jr. & Ken Are Bongo / 8:13 min.
Neavttár: Susanne Hætta

Filbma lea muhtin gievrras mearrasámi nissona birra. Vánisvuođa ja garra dálkkádaga siste leat olbmot birgen árktalaš guovlluin duháhiid jagiid. Nissonolbmot leat sámi servodathámi fievrridan buolvvas bulvii ja guoddán eallima lossa nođiid. Nisu lea maiddái son gii riegádahttá ođđa eallima, adná fuola ja fievrridan lea viidásat dan mearrasámi árbbi maŋisboahtti buolvvaide.

Filmma vuolggasadji lea Johan Sara juniora musihkka trilogiija mii sisdoallá Sea Sami, See (2016), Transforming (2017) ja Understanding (2019).

 

FILMMAŠ DAHKKON TRANSMISSION CDs / Johan Sara Jr. / 7 min.
«Mun lean eallán dan árktalaš luonddu molsašuddi jahkodagain, ja lean fuomášan luonddu jienaid. Juohke jahkodagas lea su iežas jietna mii suoivvanastá, juohke eallis lea sierra melodiija ja juohke lottis lea čielga lávlla. Ja lea deaddu, dan buolaš -40 ceahkki jaskesvuođas. Buot dát jienat ledje mu ustibat bajásšattadettiin, ja ustibin dat leat ain otne. Dat jienat birastathttet mu, ja mun háliidin daid fievrridit iežan musihkkii, ja dan lean dahkan dán CD-skearrus»

(Johan Sara jr.)

 

DUORGGAT DOARGGISTIT / Ken Are Bongo, Joar Nango, Håvard Arnhoff / 3 min.
Duottarjávregáttis čullojit 4 smávva soagáža. Muorat njáskkojit, ja duorggat dolvojuvvojitt. Jalŋásat báhcet duoddarii, eatnamii ceggejuvvon.

 

Dáiddárat
Johan Sara jr.

Ken Are Bongo

 

Vuovdemassii 

CD skearrut – Sea Sámi,See – trilogiija:  eaŋkil NOK 200 / buot 3 cd-skearru NOK 500
Plakahtat – eaŋkil plakahta NOK 200 / buot 3 plakahta NOK 500

 

.