Lena Stenberg — Ráját
22.04—18.06.2023
Lena Stenberga máŋggadáfot ja fágaidrasttildeaddji dáiddalaš barggut leat báccit, installašuvnnat, fotogovat ja kollášat. Stenberg jođaša čehpet áiggiid molsašuddi rávnnjáldagain ja eanadagain, ja guorrá lášmadit rievdadusaid ja nuppástuvvamiid sárgosiid nu mo dat vuhttojit sápmelaččaid fysalaš ja kultuvrralaš duovdagiin. Váldun su muitalusas lea Norgga, Suoma ja Ruoŧa gaskii čavgadit gessojuvvon ráját, mat leat sakka čuohcán sámiid eallimii ja eallinvuđđui.
Stenberga bargguid váimmusin leat historjjálaš ja politihkalaš guorahallamat, maid olis son suokkardallá nohkameahttun vugiid, maiguin váldokultuvrrat ja politihkalaš vuogádagat leat vealahan ja ráđđen sápmelaččaid eallima. Su dáidagiid fámolaš jienat muitalit eatnamiid háddjemis ja sámiid duolbmumis.
Stenberg lea čehpet gieđahallan hámi, saji ja materialiteahta, ja dan bokte ráhkadan dáidagiid, mat rohttejit geahčči fárrui vásihit erenoamáš dovddu, maid dat gaskkustit, ja mat hástalit geahčči iešguđet dásiin. Dat fuopmášuhttet áicat persovnnalaš ja politihkalaš beliid máŋggadáfot oktavuođaid, nu maiddái politihkalaš, historjjálaš ja dálá áiggi oktavuođaid. Su dáidda hállá kolonialismma čiekŋalis ja bistevaš árbbi ja davviguovlluid hegemoniija birra, seammás go dat fállá višuvdnan vuostálastinfámu, vuosttildeami ja doaivaga boahtteáiggi hárrái. Stenberga dáidda duođaid čájeha makkár fápmu dáidagis lea vihtanuššat vuoigatmeahttunvuođain, hásttuhit diliid rievdadit ja addit jiena sidjiide, geat leat marginaliserejuvvon ja vealahuvvon.
Rahpančájáhus 22.04.2023 di. 18.00
Rahpanáiggit 23.04—18.06.2023
Maŋŋebárggas—bearjadahkii 10.00—16.00
Lávvardaga—sotnabeaivvi 11.00—16.00
