Inghild Karlsen – MEARAS / PÅ ELLER I HAVET

Čájáhusrahpan: Suoidnemánu 2. beaivvi 2021, dii. 18:00 

Inghild Karlsen lea dán geasi váldočájeheaddji Sámi Dáiddaguovddážis. Son deavdá min stuorra čájáhuslanja  muhtun ovddeš dáidagiiguin seahkalaga maŋimuš jagiid máŋggalágan dáidagiiddisguin, muhtimat čájehuvvojit vuosttaš geardde. Son čájeha maiddái videoprográmma min filbmalanjas, ja lassin dan, son johtá olggobeallai dáiddaguovddáža ja bidjá muhtin ráje bácciidis olggos, ja mat de šaddet dáiddalaš buktun olbmuide, geahččat ja imaštallat geassebotta, dassái go daid rádjat eret čakčamánus. 

2018 geasi mátkkoštii Inghild Karlsen Finnmárkkus, ja maiddái Kárášjogas gos son beasai vuosttaš háve oaidnit Sámi Dáiddaguovddáža. Sus šattai dalán miella máhccat deike doallan dihtii čájáhusa ja dan stuorra rabas čájáhuslanjas leat vejolašvuođat mat eai leat nu galle eará čájáhusbáikkiin. Mii leat ilus go dál su čájáhus duohtan šaddá ja ahte leat mannamin rahpasut geasi guvlui goas olbmot sáhttet mátkkoštit ja searvat dáidda- ja kulturvásáhusaide.  

Inghild Karlsen dovdá nana čanastumi dán riikaoassái gos son lea eret. Son lea ovttasbargan dán guovllu dáiddárbirrasiiguin, nugo Hålogaland teater, Beaivváš Sámi Našunálateáhter ja Barents Spetakkel/Pikene på Broen. Máŋga dáidagiides vuolggasadjin leat giehtabargoteknihkat, ávdnasat, erenoamáš davvi báikkálaš eavttut, eanadagat ja fenomenat. Čájáhusas Sámi Dáiddaguovddážis oaidnit earret eará reabbábácciid oassin čájáhusas.

Inghild Karlsen válddii gieskat vuostá Rune Brynestad muitostipeandda 2021 ovddas. Norggas allaárvosaččamus dáiddárstipeanda mii lea 400 000 ruvnno. Stipeandda lávdegoddi celkkii geigemis ee.: Karlsenis leat moanaid bargguid vuolggasadji davviguovlluid konkrehta kulturhistorjá, eanadat ja eallinvuohki. Su dynamalaš ja dutki dáiddapraksisa lea šaddan mihtilmas vokabuláran, oaiváduvvon sihke báikkálaš kultuvrras ja árbevieruin, ja eurohpálaš dáiddahistorjjás. Karlsen lea barggustis bokte bidjan davvinorgga kultuvrii dáiddalaš giela.  

Inghild Karlsen (r. 1952) okta daid guovdileamos dáiddáriin Davvi-Norggas eret, guhte lea leamaš dáiddárin badjel 40 jagi, ja lea ain dan doaimmas. Son ássá ja bargá Romssas ja Oslos. Karlsena dáiddalaš geavat lea viehka viiddis, su ii sáhte álkidit govvidit. Son álohii dutká ávdnasiid, báikkiid ja ođđa hutkosiid: Son bargá máŋggalágan surggiiguin, nugo installašuvnnain, tekstiillain, báccin, fotogovain, performanssain ja scenografiijain. Su dáidagat leat čájehuvvon Davviriikkain, Asias, Latin-Amerihkás ja USAs. 

Inghild Karlsen álggahii joatkaoahpustis ovddeš Husflidskolen i Troms (1970-71) ja jotkii dasto Statens håndverks- og kunstindustriskole, tekstiila ossodagas (Oslos 1972-74), Statens lærerhøgskole i forming, govvagođđin suorggis (Oslos 1974-75), Vestlandets Kunstakademi (Bergenis 1976-81) ja Konsthögskolan Stockholmas, bázzeossodagas ((1981-82).

 

Portreahttagovva: Inghild Karlsen
Govvijeaddji: Susanne Hætta

 

Hvalkranie
Govvijeaddji: Inghild Karlsen