VANISHING // ARNOLD JOHANSEN

05/09/2020 – 08/11/2020

Grafihkka – borradeamit ja muorrasárgumat

Sámi dáiddaguovddáš lea ráhkkanan aktiivvalaš dáiddačakčii ja lágida máŋga čájáhusa Kárášjogas ja eará sajiin. Ovddemužžan lea Arnold Johansena čájáhus. Johansena «Vanishing» -čájáhusa váldun lea min lagaš historjá, ja vuolggasadjin lea su bajásšaddan Ávanuoris soađi maŋŋá. Áigodahkii lei mihtilmas ođđasithuksen, nana báikkálaš birrasat riddoguovlluin, ealás guolástangilážat ja boahtteáiggi optimisma mearragátte olbmuid gaskkas. Mearas lea álo leamaš valjis guolli – amma dáppe de lea bargu ja vejolašvuođat eatnašiidda? Dilli rievddai dattetge, ja dán áigge leat eanaš guolástangilážat báhcán muitun.

Ávanuori guolásteddjiid ovttastussearvvi muitalusa bokte Johanson čájeha midjiide ođđa grafihkkabargguinis áigodaga, goas báikkálaččat eaiggádušše guollerusttegiid ja badjebáza gulai báikái. Dáidaga bokte mii sáhttit reflekteret maŋimuš 30 jagi rievdadusaid ja jearrat leago guolástanresurssaid ja guovllupolitihka dálá hálddašeapmi vuogas. Čájáhusa oktavuođas almmustuvvá gihpa, mas dáiddár ieš láidesta čájáhussii. Dasto boahtá Gunnar Grytåsa (journalista ja čálli) teaksta, mas muitaluvvo ee. čájáhusa tematihka historjjálaš duogážis, man váldun lea guolásteapmi, soahti, ođđasithuksen, politihkka ja guolásteddjiid ovttastussearvvit.

Sámi Dáiddaguovddáš lea rámis, go beassá ovdanbuktit dán sierračájáhusa, ja go fas beassat oaidnalit dáiddáriin Kárášjogas. Čájáhusa rahpaba Knut Erik Jensen (filbmadahkki) ja Bente Geving (SDG stivrrajođiheaddji).

Arnold Johansen lea riegádan 1953 Ráissas ja šattai bajás Ávanuoris. Rávisolmmožin son lea orron Oslos, Hámmerfeasttas ja dán áigge Tromssas, gos sus lea dáiddalatnja Kystena oktasaš dáiddalanjain, maid Tromssa ja Finnmárkku fylkkagielda jođiha. Dáiddár lea riikkaoasi ovddemuččaid searvvis iežas dáiddasuorggis, ja lea dáidagisttis ovdanbuktán ee. báikkálaš birrasiid ja davviguovlluid olbmuid. Son gullá dáiddaárbevirrui, man ruohttasat mannet gitta John Savio, Kaare Espolin Johansen ja Kåre Kivijärvi dáidagii.

Arnold Johansen lea oahpu gazzan Stáhta Dáiddaakademiijas (1974 – 1980) ja lea searvan aktiivvalaččat čájáhusaide, čiŋahan visttiid ja su dáidda lea ostojuvvon almmolaš ja priváhta čoakkáldagaide badjel 40 jagi. Son lea ožžon máŋggaid stipeanddaid ja su aktiivvalaš dáiddabargui lei mávssolaš, ahte son oaččui stáhta dáhkidan dietnasa 1999. 2019 sus lei sierračájáhus Álttá dáiddasearvvis, ja son searvvai joavkočájáhusaide «Avtrykk – Norske Grafikere 100 år» Davvi-Norgga Dáiddamuseas ja «Conventus» Sámi Dáiddaguovddážis, goappašagaid lágidedje
Norgga grafihkkariid searvvi 100 jagi ávvudeami gudnin.

Govva: Arnold Johansen. Luoikkahuvvon: Gierdu.no.
Govat čájáhusas: govven Tor Egil Rasmussen.