Fámolaš ja ealas čájáhus
Čájáhus Time for Sculpture #2 – Sisti, sáras ja streaŋga lea nubbi dan golmmačájáhusráiddus mii sisdoallá dáidagiid, instállašuvnnaid ja objeavttaid luoikkahuvvon RDM – Sámi Dáiddamagasiinnas.
13 Dáiddára čájáhusas
Dáidagat dáiddáriin Daban Da (Gjert Rognli ja Asbjørn Forsøget), May Elin Eikås Bjerk, Folke Fjällström, Rose-Marie Huuva, Svein Flygari Johansen, Annelise Josefsen, Aslaug Juliussen, Per-Isak Juuso, Håvard Larsen, Patrik Marakatt, Lena Stenberg ja Ingunn Eldbjørg Utsi leat čájáhusas.
Čájáhusráiddu vuosttas čájáhusas guovdilasttii muorra ávnnasin, ja das bođii ovdan mo duodji doaibmá bázzin. Dán ođđa čájáhusas lea “litnásat” ávvnnasgeavaheapmi, ja fáddá lea maiddái loažžasat. Dáidagat leat dahkkon sisttis, sárrasiiguin máŋgga ávdnasis, tekstiillas, streaŋggas ja liinnis. Golbma čiŋahuvvon rumbbu váldet vuostá geahčči čájáhusas, ja maid Håvard Larsen, Per Isak Juuso ja Patrik Marakatt leat duddjon. Sámi kulturhistorjjás leat rumbbut dat boarráseamos čiŋahuvvon objeavttat maid mii odne diehtit. Rumbbut jorahit gehččiid jurdagiid rituálalaš áššiid guvlui, ja dan seamma dahká Daban Da dáiddárduo videofilbma, ja maiddái Rose-Marie Huuva báccit addet rituálalaš assosierema.
Aslaug Juliussena dáidagiin oaidnit sistti ja iešguđet lágan sárrasiid, ja son geavaha maiddái earret eará heastasárrasiid installašuvnnainis. Rose-Marie Huuva adná duollji, bohcconáhki ja njuorjjonáhki objeavttainis ja bácciinis, Svein Flygari Johansena videoinstallašuvnnas lea bohccoduollji mielde ja Ingunn Utsis lea maiddái jiekŋaguovžanáhkki guovtti báccis ávnnasin. Dan máŋggabealalaš ávnnasgeavaheami báccedahkamis; nu go streaŋga, tekstiilla ja vinyla oaidnit Folke Fjällströma, Annelise Josefsena ja Lena Stenberga bácciin.
Beaivváš dál lea fas ihttán ja May Elin Eikås Bjerka málagovva beassá dan symboliseret. Govas lea ábstrakta hábmi, muhto motiiva sulastahttá beaivesuotnjariid.
Čájáhuskuráhtor: Kristoffer Dolmen, SDG
Ovttasbargu gaskal SDG ja RDM
Čájáhus lea oassin ođđa ovttasbargoprošeavttas gaskal Sámi Dáiddaguovddáža (SDG) ja RiddoDuottarMuseaid (RDM). Lasi prošeavttadieđuid addá direktevra.
