Čájeheaddjit: Per Adde, Asbjørn Forsøget, Aage Gaup, Trygve Lund Guttormsen, Annelise Josefsen, Aslaug Juliussen, Britta Marakatt Labba, Mathis Nango, Hege Annestad Nilsen, Hilde Skancke Pedersen / Kennth Hætta, Synnøve Persen, Outi Pieski, Alf Salo, Elisabet Aalsos Strand, Anders Sunna, Ingun Utsi, Eva Delving Wiklund.
Sámi Dáiddaguovddáš (SDG) lea fárremin.
Buohkat vuorddašit iluin beassat leat ođđa lanjain, muhto dattetge lea veahá morašlaš guođđit boares doaibmabáikki.
Doaibmguovddáš lea bálvalan SDGa 14 jagi, ja ollu olbmot leat álo eahccán dan.
Dáiddárat ráhkadit stuorra dáidagiid. Muhto jos dat leat čihkosis dáiddára bargolanjas, de dat ii leat goassege olus árvvus. Dáidda ealligoahtá go dat beassá boahtit olbmuid oidnosii. Go dáiddár oskkilda bidjat iežas dáidaga máilmmi ovdii, vai olbmot dan besset oaidnit, easkka dalle dat dáidda oažžu árvvu. Dat, mo geahččit muosáhit dáidaga, álggaha geahččiid ja dáidaga gaskasaš proseassa. Muosáhus lea olbmuid mielde, juohkehačča muosáhus lea su iežas, earálágan go earáin. Ja dát dat lea vuođđu dán čájáhussii, mii lea maŋimuš čájáhus dán boares doaibmaguovddážis.
Buohkaide geat oskkáldasat leat láven boahtit čájáhusaide, lea sáddejuvvon bovdehus, SDGa ovddeš ja dáláš bargiide, ja Sámi dáiddačehpiid searvvi lahtuide, ja bovdehusas ávžžuhuvvojedje SDGa ovddeš čájáhusaid vuođul árvalit dáidagiid maid sii háliidivčče fas oaidnit. Dakkár dáidaga mii dovdui váibmui, vuoigŋašiidda ja čoavjái, dakkár muosáhusain mii bázii millii.
Ollu árvalusat leat boahtán midjiide, ja muhtumat leat dadjat jo boŧardan buriid dáiddavásáhusaideasetguin. Midjiide geat leat Dáiddalaš ráđis (DRas) ja geat odne leat SDGa bargit, lei buorre vásihit nu stuorra beroštumi. Mii beasaimet diehtit ahte doppe leat ollu olbmot geain leat buorit ja erenoamáš dáiddamuosáhusat SDGa čájáhusaid geažil. Gaskkusteapmi lea stuorra hástalus, ja justa dás lea sáhka gaskkusteamis. Mii oaččuimet duođaštusa das, ahte dáiddárat ja SDGa čájáhusat leat ollán olbmuid váimmuide.
Mii sávvat buohkaide bures boahtima Sávaldatdáidagiid čájáhussii. Sihke oažžun dihtii ođđa muosáhusaid čájáhusa ovddeš dáiddabargguin, ja dahkan dihtii earrodearvvuođaid boares SDGii.
Mii giitit buohkaid geat sáddejedje midjiide iežaset sávaldagaid!
Govva: Outi Pieski, Gollegákti , 2006
