ČÁJÁHUS: LÁTNA ÁVNNASLAŠ MÁILMMI GOVAIN MAT LEĐGOT DOVDDAIPMÁRDUSA PERIFERIIJAS!
Olof Marsja (r. 1986, Jielleváris) bargá bazzedahkamiin man bokte son analysere ja seaguha ultraođđaáigásaš digitála duohtavuođa ja popkultuvrra historjjá ja árbevieruid mat gullet su iežas sámi árbái ja duodjái.
DÁIDDÁR & DÁIDDA
Marsja dutkamis lea duodji ja ávnnas guovddážis, ja su dáidagiin vuohttá viiddis geavatlaš máhtolašvuođa ja referánssaid hybrida hámiide main son duođalaččat ja humoristtalaččat analysere historjjá, dálááigge máilmmi ja identitehta gažaldagaid.
Ávdnasat bácciin sáhttet leat muorra, čoarvi, glássa, duollji, oapme skuovat dahje mopeda oasit. Bácciiguin son maiddái guorahallá dan heahpanaddama go olmmoš ii dovdda iežas historjjá, go eallá eahpádusaid siste ja ii dovdda gullevašvuođa gosage, dego ilmmiid gaskkas eallit.
Marsja lea oahpugazzan Crafts & Design, Konstfack University of Arts, Stockholm (2017) ja oaččui Maria Bonnier Dahlin stipeandda jagis 2019. Su dáidagat leat earret eará čájehuvvon Göteborgs Konsthall:s (2020), Bonniers Konsthall:s (Stockholm, 2019), Steinsland-Berliner Gallery:s (Stockholm, 2019), Luleå Biennalenis (2018), ja dál fargga beassatge vásihit su vuosttas institušuvnnalaš sierračájáhusa dáppe SDGs (2021) ja čájáhus galgá maiddái máidnojuvvot dehálaš dutkosis Rösshka Museum of Arts and Crafts ( Göteborg, 2021). Olof Marsja ássá ja bargá Gøteborg gávpogis Ruoŧas.
Čájáhusrahpandoalut eai lágiduvvo
SDG váldá korona leavvama Kárášjogas duođalaččat ja daid plánejuvvon rahpandoaluid eat lágit. Čájáhusa sáhttá liikká galledit rabasáiggis, muhto šállošatgo eat sáhte fállat joavko ofelastimiid. Mii ávžžuhat galledeaddjiid spriitet gieđaid, geavahit njálbmesuoji ja doallat gaskka. Jus leat buozas, de biso ruovttus. Čájáhusii luoitit sisa eanemusat 10 olbmo oktanagas.
Mii ávžžuhat buohkaid čuovvut covid njoammuneastadan njuolggadusaid. Giitu go veahkehat eastadit njoammuma.
Govva: Tiden (Áigi), 2021. Govven: Olof Marsja.
