Fredrik Prost (r. 1980) lea duojár ja girječálli gii álmmuhii iežas vuosttaš girjji guovvamánu 2023. Leŋges hearggi, sáhčal fatnasa nammasaš girji muitala sámi noaidevuođa birra ja almmuhuvvo DAT lágádusa bokte. Prost lea badjelaš 20 jagi dutkan sámi vuoiŋŋalaš árbevieru ja geavaha poesiijja, dološ gálduid ja muitalusaid hearvvas vuogi mielde čalmmustahttit min sámi vuoiŋŋalaš árbevieru. Su vuođđu lea duodji mainna son lea bargan badjelaš 25 jagi ja duddjomis son oahpásmuvai goavdái mii geasuhii su. Son lea máŋgii leamašan bovdejuvvon, miehtá Sámi, logaldallat ja doallat kurssaid sámi vuoiŋŋalašvuođas. Okta su bargguin lea Tidstrumman nammasaš bázzi mii golggotmánus 2022 vuosehuvvui Östasiatiska museas Stockhoalmmas. Prost lea duojár, dáiddaduojár ja čálli gean barggus boahtá ovdan nanu oktavuohta sámi kultuvrii, giehtačehppodahkii ja vuoiŋŋalašvuhtii. Su čállosiin son vuoseha váimmolaš ja čiekŋalis ipmárdusa lundui; sihke olbmo, ilmmiid ja máilmmi luondu.

Inga-Wiktoria Påve (r. 1990) lea dáiddár gii lea ovttasbargan Prostain Leŋges hearggi, sáhčal fatnasa nammasaš girjjiin. Prosta muitalusaid vuođul Påve lea ráhkadan hearvvas, čáppa ja muitaleaddji govaid mat bukte girjái erenoamáš ilmmi. Påve lea ovdalis illustreren girjjiid mat leat ee namahuvvon Davviriikkaid ráđi girjebálkkašupmái. Påve lea govvadáiddár, duojár ja dáiddaduojár. Su dáidda ovdanbuktá máŋggabealat muitalusaid gos olbmo suoivvanasat ja maiddai hearvvas bealit bohtet ovdan muitaleaddji ja dramáhtalaš lihkastagaiguin ja čuovggain. Iežas dáidagis son váldá vuhtii sápmelaččaid dološ muitalusaid sápmelaččaid árgabeaivvi ja siskkaldas vuoiŋŋalaš eallima birra.