ČÁJÁHUS: VUOIŊŊASTAT!
DÁIDDA
Hilde Skancke Pedersen áigu dáinna čájáhusain čájehit ovtta daid stuorámus sierračájáhusaid mii ovtta dáiddáris lea leamaš Sámi Dáiddaguovddážis. Son váldá atnui buot lanjaid maid sáhttá: váldolanjaid, blackbox, feaskára ja jietnastudio. 3 vahku lea barggildan bidjat sadjái dáidagiid ja ráhkadit installašuvnnaid čájáhuslanjain ja loahpahit bistilis proseassa, dáiddára álgoideaid rájes gitta dákkár hirpmástuhtti bohtosii. Čájáhus lea máŋgga jagi barggu boađus ja dat deavdá guovddáža movttáskahtti vuogi mielde. Geahččit ožžot veaháš «wow»-dovddu dán dáidaga deaivvadettiin. Hilde Skancke Pedersen ii bala bargagoahtit sturrodagaiguin ja áigegáibideaddji bargguin.
Čájáhusa dáidagat leat máŋggasuokkat, ja dás deaivvadat arkitektonalaš installašuvnnain, videoin, ávnnasgovaiguin, tekstiilabargguin ja málagovaiguin. Ávdnasiid dutkamat leat čuohcci – dain vuhtto eallán eallin, juoga lea gávdnan ja čohkken, eará lea ovddeš lávdebargguid fas geavahus, muhto čoahkkádusa bokte sihkuhuvvot dan árabut doaimmat.
Go geahččit lávkejit A latnjii fertejit mannat čađa stuorra arkitektonalaš hámi ráhkaduvvon muoras, báddečatnosis ja tekstiillas, dát lea ožžon Čiehká – Skjul – Shelter namahusa. Čájáhusa eará váldodáidda lea 7,50 mehtera guhku tekstiilabargu Bassi várri – Hellig fjell – Sacred mountain namahusain. Nuppi lanjas čuovvu stuorát installašuvdna mas leat gouacher ráidu Áhkut namahusain, mii lea daid nissonolbmuin, geaid lea dárkon ruovttugilis Guovdageainnus, inspirerejuvvon ja sin gudnejahttin.
DÁIDDÁR
Hilde Skancke Pedersen lea riegádan Hámmárfeasttas ja ássá Guovdageainnus Finnmárkkus, Norggas.
Son lea oahpu gazzan dáiddaallaskuvllas Oslos ja girječállioahpus 1 ja 2 Romssa Universitehtas.
Su váldofokus lea visuála dáidda oktan dáiddafilmmaiguin, muhto son bargá maiddái lávdeteavsttain ja poesiijain, ja teáhtera ja dánssa lávdehábmejeaddjin ja bivttashábmejeaddjin. Barggadettiin visot dáid surggiid dáidagiin váikkuhuvvo son eallimis Finnmárkkus ja Sámis muđui. Kultuvra, luondu, dálkkádat ja birrasat dáppe ja eará guovlluin gos lea fitnan, darvánit jurddagovvan ja impulsan iešguđet bargguin.
Hilde dávjá bargá šáŋŋerrasttildeaddji gaskal govvadáidaga ja lávdedáidaga, mii šaddada máŋggalágan ovdanbuktimiid performance šáŋŋeris. Govvadáiddárin lohkkojuvvojit su guovttebealat dáiddabarggut Norgga Sámedikki dievasčoahkkinlatnjii ja feaskárii su váldodáiddabargun. Su leat leamaš moanat oktočájáhusa, ja lea searvan máŋggaid joavkočájáhusaide sis- ja olgoriikkas. Kuratoran lea son dáidagiin bargan čájáhusaide, almmolaš lanjaide ja museaide.
Son berošta politihkas ja fágapolitihkas, ja sus leat leamaš máŋga luohttámušdoaimma sámi ja dáža dáiddárservviin. Son lea dáiddaguoibmi Dáiddadálus.
Hilde lea earret eará doallan čájáhusa Modena Museetis Ruoŧas ja dáiddamuseas Murmánskkas. Son lea searvan performancejoavkkuin Göteborgas, Ruoŧas ja Guovdageainnus, ja lea čájehan okto-performance New Yorkas.
