ČÁJÁHUS: Duodji guovddážis: čoarvi & dákti čájáhussii!
Čájáhusas ovdanbohtet duojit ja dáiddaduojit luoikkahuvvon RiddoDuottarMuseat-Sámi Dáiddamagasiinna čoakkáldagas.
DÁIDDA
RiddoDuottarMuseat-Sámi Dáiddamagasiinna čoakkáldat sisdoallá dáidagiid iešguđet ávdnasis ja teknihkas, ja ollilašgovas oaidná mihtilmas sámi ovdanbuktojumiid. Dán čájáhusas guovdilastet ávdnasat čoarvi ja dákti, mat leat váldo ávdnasat duojis. Dás oaidná dáidagiid main leat árbevirolaš hámit ja herarvvat, muhto maiddái dáiddaduojit main eai leat čielga árbevirolaš sámedujiid hámit maid sáme duojárat ja dáiddaduojárat leat duddjon.
Bohccočoarvi geavahuvvo dávjá dušše áidna ávnnasin dáiddaduojis ja árbevirolaš duojis, muhto máiddái seaguhuvvo sihke muorain ja silbbáin. Dat buoremus čoarvvit duddjoma várás leat varris bohccočoarvvit, ja čoarvemátta geavahuvvo eanemusat. Bohccočoarvvi hámi hábme dat biebmu man boazu
borrá, bohcco “sosiála eallin” ja bohcco dearvvašvuohta. Čoarvvit eai galgga leat sieksaluvvan, muhto galget leat boakŋásat/nannosat, dalle lea álki hearvvaid sárgut ja maiddái sojahit daid. Leage hui dehálaš válljet rivttes čorvviid duddjoma várás. Čoarveoasit mat vel báhcet maŋŋil go duddjomis geargá, eai galgga bálkestuvvot, muhto vurkejuvvot maŋŋeluht adnui, ja dat leage maiddái dehálaš oassin duodjehommás.
Dujiid hábmemis leat čavgadis njuolggadusat. Iešguđet guovlluid árbevirolaš hearvvaid eai galgga duojárat seaguhit seamma duojis. Muhto lea ain lohpi geahččaladdat hearvvaid seaguhit iežas guovllu hervenmálliid siskkabelde, ovddidan dihte duojára iežas hervenmálle.
DÁIDDÁRAT
Jon Ole Andersen, Mihku Biehtár / Petteri Laiti, Fredrik Prost, Sune Enoksson, Arne Joma, Per Isak Juuso, Per-Stefan Idivuoma, Johan Rist, Martin Kuorak, Nils-Johan Labba, Lars Erik Marsja, Per Aira, Olavi Sakari Saijets, Stig Berqvist, Per N. Blind, Nils Jonas Persson, Jonathan Suorra, Folke Fjällström, Aslaug Juliussen, Olof Svonni, Lars Pirak, Sven Åke Risfjell, Thomas Magnusson, Thomas Marainen, Ronald Senungetuk.
Čájáhus lea oassin ovttasbargoprošeavttas Samisk pedagogisk metode for kunst- og kulturformidling 2019 – 2021 gaskal Sámi Dáiddaguovddáža ja RDM-Sámi Dáiddamagasiinna. Prošeavtta ulbmil lea čájáhusgaskkusteapmi dáidagiiguin luoikkahuvvon RDM-Sámi Dáiddamagasiinna čoakkládgas.
Dat gaskkustepmi galgá leat sámi perspektiivvas.
Govva: Folke Fjällström, Namaheapmi. Duddjojuvvon 80-logus.
Govven: Kjell Ove Storvik.
