Čájeheaddji: Anders Sunna.
Anders Sunna lea nuorra dáiddár gii áinnas hárdá. Čájáhusas Got Democrazy lea sihke collage ja installašuvdna, das čájehuvvojit govat mas vuostálasvuođat gaskal boazodoalu ja politihka bohtet čielgasit ovdan. Son háliida muitalit mo servodat doaibmá, ja mo máilbmi duođai lea. Son váldá ovdan iežas bearraša ja Ruoŧa eará boazodolliid historjjá. Su govain leat dávjá máŋga muitalusa, ja su collagiin ja installašuvnnain son muitala daid duogábeali. Duogábeali mii ii leat nu čáppat, maid son háliida oažžut ovdan.
Gándan juo mearridii Anders Sunna šaddat dáiddárin. Sunna beasa bargat ovttas dáiddáriin Lars Pirak ovtta gaskka, ja dalle son hábmii iežas vuogi. Anders Sunna riegádii jagis 1985 Kieksiäisvaaraa, Pajala suohkanis. Son válddii oahpu Konstfackas Stockholmas, friija dáidaga ossodagas, ja Upmeje dáiddaskuvllas. Sus lea leamaš čájáhus Liljevalchs vårsalongas ja galleriijain earret eará Upmejes ja Stockholmas. 2009:s lei son dan jagi nuorra dáiddár Riddu Riđđu festiválas.
Ovttas fotográfain Michiel Brouwer lea Anders Sunna ožžon stuorra fuomášumi Jämtlandas ja Härjedalenis
čájáhusain Maadtoe. Čájáhusas čájehuvvo Ruoŧa sevdnjes historjá das mo sápmelaččaiguin leat meannudan, ja das mo sápmelaččaiguin meannuduvvo vel dál ge.
