Dán jagi suoidnemánu rájes Sámi dáiddaguovddáš álggaha ođđa vuogi, mas čájehit dáidaga feaskáris ja guovddáža olggobealde. Ráiddus čájehit dáiddáriid bargguid, geat barget erenoamážit materiálavuđot giehtadujiin ja geavatlaš čehppodagain.
Ovddimužžan čájehit Gunvor Nervold Antonsena tekstiiladáidaga feaskáris ja muorrabácci olgun. Dáid dáidagiiguin dáiddár háliida seammás gudnejahttit Iver Ándde Ivvár Ivvára (Ivar Jåksa):
– Iver Jåksa dáiddabarggus lea árvu munnje dáiddalaččat, ja maiddái olmmošoainnu ja eallinoainnu dáfus. Su dáidagiin vuhtto ekologalaš jurdda. Son ráhkadii dáidagiiddis ávdnasiin, mat ledje ieža ovdánan dán máilbmái, ja buvttii daid čájáhusaide, muhtumin sirrii daid, dahje hábmii daid hápmái dahje sisdoallun, mii loahpas sáhtii fas moallanit ja nohkat iežas eallingierddu loahpas. Jåks hábmii bassi árvvusatnima luonddu fámuide, ja beroštii luonddu mearkkašumis alddis. Vaikko su dáidagat ovdanbuktet, ahte olmmoš lea eanet ja eanet amasmuvvan, de vásihan su dáidagiid vuođđun positiiva jáhku olbmo ala.
Go lea “esla te”, bajásgessojuvvon manin nu, de dat muitala juoidá mo olmmoš hápmašuvvá bajásšaddamis, árbbi ja birrasa vuođul. Dihto sadjái gullan, gullevašvuođa dovdu. Olbmo čatnasat šaddanbáikái, main dađistaga eallima áigge báhcá dušše jurdda. Gullevašvuođa dovdu, konkrehta fysalaš čanus dahje ovddasvástádusa dovdu, maid ii hálit dahje sáhte guođđit. Iver Jåks máhcai ieš davás maŋŋá go lei guhká orron eará guovllus. Su dáidagiidda lea maid mihtilmas su mánnávuođa materiálaid ja elemeanttaid gudnejahttin.
Esla te, 2018
“Esla te” lea roavva ja lossa bázzi, mii orru ruohtasmuvvan dohko, gos dat ceaggá. Dat veadjá leat metafora dan fysalaš hápmašuvvamis, mii dáhpáhuvvá bajásšattadettiin, birrasa ráhkisvuođas.
Giđđa (ruoksat), 2018
Stuorra tekstiiladáidda Giđđa vuođđun lea giđđa, goas eanan runiida, ealáska, šaddagoahtá. Iešguđet rukses ivdnevariánttain mii oaidnit sierra gerddiid dáidaga bajágeahčen. Giđas bohciida jáhkku eallimii, eallingierdui ja maiddái olbmui.
Dáiddára birra
Gunvor Nervold Antonsen (r.1974, Oslos) lea govvadáiddár, ja orru ja bargá Rollagas, Numedalas (Buskerudas). Son bargá iešguđetlágan ávdnasiiguin ja ovttastahttá tekstiillaid, muorrabácciid, njuohtamiid ja historjjálaš objeavttaid viiddis ávnnaslaš komposišuvdnan. Son geahččaladdá ja ovdanbuktá ealás vugiiguin, ja váldá ovdan fáttáid, maidda laktása rájáid rasttildeaddji áddejupmi servodagas, leahkimis ja identiteahtas, materiálahis máhtu árvvut, mat lea nannosit gitta báikkálašvuođas. Barggut ovdanbuktet iešguđet eallinoainnuid, eallinritmmaid ja árvoválljemiid, ja jerret makkár čuovvumušat leat jos servodat politiserejuvvo menddo ovttaguvllogin.
Gunvor Nervold Antonsen lea váldán oahpu Bergena dáiddaallaskuvllas ja Kunsthochschule Berlin Weissensees. Nervold Antonsen lea doallan ollu sierračájáhusaid iešguđet ásahusain, omd. House of Foundation, Moss (2017), Textilmuseet, Borås (2016), Akershus Kunstsenter (2013), Soft galleri (2010), ja Kunstnerforbundet (2018, 2013 ja 2004). Son lea searvan maid ollu joavkočájáhusaide iešguđet čájáhusbáikkiin, nu mo Stavanger Kunsthall (2018), Kunstnerforbundet (2017), Bomuldsfabriken Kunsthall (2017), Wildlife Skulpturpark (2017-2020) ja Skulpturbiennalen, Vigelandsmuseet (2016). Su barggut leat mielde iešguđet čoakkáldagain nu mo KODE, Norges Bank, Nasjonalmuseet for Kunst, Arkitektur og Design, Nordenfjeldske Kunstindustrimuseum, Olgoriikkadepartemeanta ja Norgga kulturráđđi.
