Ánde Somby ja Christopher Watson
Ánde Somby juoigá fámolaš ja vuoiŋŋalaš luđiid jietnainstalašuvnnas Yoiking With the Winged Ones.
Juoigi ja dáiddára Ánde Somby installašuvdna Yoiking with the Winged Ones deavdá olles SDS stuorra sále juigosiin ja luonddujienaiguin. Son lea ovttas jietnadáiddár Christopher Watsoniin láhčán oahppaladdiide ereliiggán musihkkavásáhusa. Bálddas, B sáles, čájehuvvojit Ándde gahpirat, maid son lea gieđain gorron ja hábmen ovtta ja ovtta, árbevirolaš čiehgahpira vuođul.
«Juoigan lea Stonehenge mii ii leat ráhkaduvvon geađggis,» dadjá Ánde Somby, go čilge mii juoigan lea. «Juoigama govastatárvu lea harbmat stuoris. Juoigan boahtá agálaš áiggis – ja lea gievrrat dál go goassege ovdal – vaikko romalaš váldegoddi, kristtalašvuohta ja maŋŋelis iešguđege nationála stáhtat lea soahtan juoigama vuostá», son joatká. Dán prošeavttas, Yoiking With the Winged Ones, leat mielde sihke árbevirolaš luođit, nu mo Gumpe ja su iežas bidjan luođit. Buot lea báddejuvvon olgun, gos báikki iežas jienat dievasmahttet Ánde Somby fámolaš eamijuoigama.
Christopher Watson lea bádden sihke Ándde juoigama ja báikki jietnamáilmmi, mii almmustuvai 2017:s vinylaskearrun. Dál das čohkiida fámolaš ja magiijalaš jietnainstallašuvdna ja juoiganbázzi SDG lanjain, gos Watson fuolaha 6 kanála jietnameannudeames.
Ánde Somby (1958) lea juoigi, musihkar, sámi girječálli ja riektediehtaga vuosttasamanuensa, ja ássá Romssa gávpogis. Son lea juoigan dan rájes go lei 16 jahkásaš , ja artistan 1974 rájes. Somby lea loaiddastan miehtá máilmmi jogo juoigin ja soloartistan dahje musihkkajoavkku lahttun; vuos Vajasis ja dasto maŋŋá Sombánis.
Christopher Watson lea musihkar ja jietnadáiddár. Son gullá luođoelliid ja luonddualbmonemiid máilmmi njunušbáddejeddjiide, ja lea earret eará dovddus das ahte lea bádden jienaid David Attenborougha dovddus BBC luonddudokumentáraid várás. Son lea maid Sheffieldii vuođđudan vuoibmás sesolaš musihkkajoavkku Cabaret Voltaire (1971). “Min máttuid jienat leat jávohuvvan Englánddas, nu mo eatnat eará eatnamiinge máilmmis. Go gullen muhtima gean nu juoigamin, dat čuzii munnje buiga eamidovdun,” dajai Christopher Watson, go báddii Ánde Somby vákkis olggobealde Kvalnesa.
Jietnainstallašuvnna lea kurateren ja buvttadan Elin Már Øyen Vister, gii ieš lea jietnadáiddár ja jođiha dáiddárorohaga ja searvvi Røst AiR.
