Čájeheaddji: Sergey Gavrilov.
“ČSV Muhtun jurdagat”, maid govvideaddji Sergey Gavrilov, Ruoššas eret, lea dahkan, lea prošeakta ČSV birra.
Sámepolitihkalaš ovdáneapmi miehtá 1970- ja 1980-logu lei máŋgga láhkai giđaiduvvan. Dan ovdáneapmái bohte eaiba unnánge ollu dáiddalaš ilbmadeamit. Nuorra sámit háliidedje oažžut ruovttoluotta visot maid ledje massán. Sámi historjjás dat lei politihkalaš ja kultuvrralaš liđiideapmi mii ii lean goassege ovdal leamaš. ČSV šattan doaban. Dan mearkkašupmi sáhttá ee. leat: Čájet Sámi Vuoiŋŋa!
Kultursemináras mii lei Sirpmás jagi 1972, semináraolbmot ožžo doaibmamuššan ráhkadit oanehis cealkagiid dahje čuorvvasániid mat vulget dan golmma bustávas. Dat cealkagat ja čuorvvasánit čilgejuvvojedje leat sámi viessotávval.
Gavrilov buktá dás ruovttoluotta muitui dan mii dalle dáhpáhuvai, jearadettiinis muhtun dáláš nuorra sámiin sáhttetgo čálistit sániid maid ČSV bajida sin muitui. Su prošeavtta ulbmil lea gávnnahit mo ČSV áddejuvvo ja dulkojuvvo odne. Leago oanádus ain sámepolitihkalaš vuoiŋŋas oassi?
Čájáhusa nuppi oasis čájehuvvo ČSV nammasaš filbma, mii lea oassi Gavrilova journalistihka bachelor-barggus.
Čájáhusas lea álkis ilbmadannvuohki, mas ii leat dramatihkka, ja mii mealgadii lea jienaheapme, ja dattetge speadjalastá garra dovddu.
Sergey Gavrilov (28) lea Lujávrris eret mii lea Guoládatnjárggas. Sus lea historjáoahpaheaddji oahppu Murmánskka universitehtas, ja geassemánus 2013 son gearggai iežas journalistihka bachelor-grádain Sámi allaskuvllas Guovdageainnus. Son lea doaibman govvideaddjin jagi 2009 rájis ja vuođđudan fitnodaga Gavrilov Media jagi 2012.
