Show Me Colour: Resist, Stand Up, Advocate
Čájet ivnni; Vuostálastte, Čuožžil, Ovddit
Tråante 2017, 5.2 – 12.2 b Trondheim
Show Me Colour/Čájet ivnni lea dáhpáhusaid ja installašuvnnaid ráidu, man vuolggasadji lea dálá sámi dáidagis ja kulturhámiin. Dáiddalaš ovdanbuktimat ja politihkalaš fáttát deaivvadit prošeavtta čájáhusain, performánssain, akšuvnnain dáiddárságastallamiin ja eará doaimmain. Sullii logi sámi dáiddára iešguđet dáiddasurggiin oassálastet. Prošeakta rahppojuvvo Tråante 2017 ávvovahku áigge guovvamánus Troandimis, ja doaimmat leat dalle miehtá vahku.
Show Me Colour čájeha politihkalaččat aktiiva dálá áiggi sámi dáidaga, ja vástida njuolga sámiid vuosttaš riikkačoahkkima čuohtejagiávvudeapmái ja dálá áiggi politihkalaš gažaldagaide ja hástalusaide. Prošektii leat bovden dálá áiggi sámi dáiddáriin ođđa bargguid ja dáidagiid, geat iežaset dáiddadoaimmaid vuođul buktet ovdan mávssoleamos dálá áiggi čuolmmaid ja seammás guorahallet makkár fámuin dáidda sáhttá bávkalit politihkalaš gažaldagain.
Show Me Colour sisdoallá sihke Synnøve Persena ja Geir Tore Holma sierračájáhusaid. Synnøve Persena čájáhus Who´s Afraid? Gii Ballá? lea ođđa monokroma oljonjuohtamiid ráidu, mii aktivere dáiddára iežas originála sámi leavgga árvalusa, maid son ráhkadii 1977 dalá politihkalaš ja dáiddalaš iehčanasvuođa dáistalemiid várás. Geir Tore Holm ráhkada ođđa meditatiiva installašuvnna mas luondduárvvut deaivvadit birasáitagiiguin.
Marita Isobel Solberg čađaha láddejuvvon performánssa,man namma lea Mearrasámi metaforat/Laponis Metaphoris de Mare. Anonyma dáiddár- ja aktivistakollektiiva Suohpanterror joatká dekoloniála prošeavttainis ja searvá sihke performánssain ja ođđa plakáhtaiguin ja animašuvnnaiguin. Dáidenakšuvnnas ja konsearttas vásihit dáiddára Anders Sunna ja musihkkaartistta Sofia Jannoka; aiddobáliid álggahuvvon prošeavttas Sami Girl Gangas lea akšuvdna, ja beassat maid vásihit Geir Tore Holma ja Elina Waage Mikalsena jietna- ja teakstaperformánssa. Lágidit maid jorbabeavdeságastallama, masa servet ee. dáiddárat Sissel M Bergh ja Anders Sunna, ja mas ságaškuššat sámi dáidaga politihkalaš geavada ja man muddui dat váikkuha.
Show me Colour buvttadeaddji lea Sámi Dáiddaguovddáš/Samisk senter for samtidskunst ja ovttasbargit leat Trøndelag senter for samtidskunst ja RAKE Visningsrom. Show Me Colour oažžu doarjaga Norgga sámedikkis, Norgga kulturráđis ja Ruoŧa sámedikkis.
