Álttá museas – áigodat: 03.06.-10.10.2021
FUOM! Čájehanáigodat guhkiduvvon!
Dát čájáhus lea vuosttas golmmaráiddot čájáhusain main guorahallojuvvo golmmaolat dáidda ja bázzedahkan. Juohke ráidooasse čájáhusas lea sierra fáddá. Dát čájáhus lei vuosttas geardde oaidninláhkai dálvet 2019:s Kárášjogas, ja dan rájes maiddái oaidninláhkai Vuotnabađas ja Hámmarfeasttas. Geahččit leat bures váldán vuostá čájáhusa ja mii sávvat ahte Álttá museas geahččit maiddái dahket dan.
Sámis lea erenoamážit muorra árbevirolaš ávnnasin, sihke bázzedahkamis, muhto maiddái duojis. Ivvar Ivvár/Iver Jåks (1932-2007) lea erenoamáš dán oktavuođas, dovddus dáiddár muhto maiddái inspirašuvdnan maŋit áiggi dáiddáriidda. Dát čájáhusráido oassi guorahallá man láhkai sámi dáiddárat barget golmmaolat bargguiguin, objeavttaiguin, bácciiguin ja instálašuvnnaiguin, iešguđet ávnnasgeavahemiid bokte. Čájáhus lea huksejuvvon luoikkahuvvon dáidagiiguin RiddoDuottarMuseat-Sámi Dáiddamagasiinnas Kárášjogas.
Dáiddárat čájáhusas
Jon Ole Andersen, Folke Fjällström, Aage Gaup, Annelise Josefsen, Per Isak Juuso, Iver Jåks, Håvard Larsen, Max Lundström, Randi Marainen, Margrethe Pettersen, Maj-Lis Skaltje ja Inngunn Utsi. Sii leat iežaset sierranas dáiddalaš doaimmaiguin dehálaš jienat sámi dáiddalávddis. Sii ásset iešguđet guovlluin Sámis, sihke ruoŧas ja norggas, ja buohkain sis leat viiddis dáiddalaš doaimmat.
Sámi Dáiddaguovddáža vuoruhuvvon doaibma lea čájehit čájáhusaid ovttas čájáhusbáikkiin Nordlánddas ja Romsa-Finnmárkkus, vai sámi dáiddáriid dáidagat olahit eanet gehččiid dán riikkaoasis.
Sámi Dáiddaguovddášis ja RiddoDuottarMuseaid ossodagas Sámi Dáiddamágasiinnas leamaš 2019 rájes aktiivvalaš ovttasbargu, prošeakta Samisk pedagogisk metode for kunst- og kulturformidling 2019 -2021 ( Sámi pedagogalaš dáidda- og kultuvrragaskkusteami vuogádat 2019 – 2021) man lea ruhtadan Norgga Kulturráđđi. Prošeavtta ulbmil lea gaskkustit ja čájehit dáiddačoakkáldagaid Sámi Dáiddamagasiinnas. Čoakkáldat mii lea vuolggasadjin, lea huksejuvvon máŋggaid jagiid badjel, ja mii ain stuorru jagis jahkái Sámedikki sisaostinlávdegotte dáiddaoastimiid bokte.
Dál lea sámi dáidagis hui erenoamáš dilli. Daid maŋimuš jagiid leat máŋga stuorra dáiddačájáhusa sihke siskkabealde ja olggobealde Davviriikkaid, čájehan alla dási ja girjáivuođa sámi dáidags. Álaheajus lei stuorát manifestašuvdna skábmamánus 2019, gos dáiddáriin lei iežaset sierra dáiddafestivála. Čájáhus “Time for Sculpture I / Muorra – árdnan I” čuovvolahttá áŋgiruššama Áttá Museii hui vuohkkasit, ja gos sámi dáidagis lea lunddolaš sadji prográmmas molsašuddi čájáhusain.
Govven: Laila Labba, Sámi Dáiddaguovddáš.
