Čájeheaddjit: Tomas Colbengtson, Grethe Irene Einarsen, Camilla Figenschou, Hanne Grieg Hermansen, Dan Lestander, Trygve Luktvasslimo, Camille Norment, Ina Otzko, Sonja Siltala ja Bjørn Tore Stavang.
«Reflex» lea buvttaduvvon Davvi-Norgga dáiddaguovddáža ja Sámi dálá dáidaga guovddáža ovttasbarggus.
Fáddá mii lea miehtá čájáhusa lea speadjalastin ja deadjun. Dajahus lea ahte speadjal ii sáhte gielistit. Seammás das lea magiijalaš fápmu das mo dárkilit čájeha duohtadili ja dattetge vel dakkár duohtadili mii lea dainna vuostálagaid.
Davviguovllut leat árbevirolaččat geasuhan dáiddáriid iežaset erenoamáš čuovgga geažil. «Reflex» geavaha joatkevaččat dán árbevieru, muhto geavaha dan nuppegežiid; dasgo dás sáhka hárve lea subliibma čuovgasa birra mii gullá lundui. Duot ávgadas luonddu viđá čuovggas ferte vuollánit earalágan čuovggaide; dakkáriidda mat árgabeaidili rájis leat olbmuide dábálaččat, nugo neon, gitta ávdnasiid deadjumiidda mat máhcahit čuovgga galleriijalanja birrasiidda, gitta deadjumiidda mat muhtumin eahpečielggasmahttet dan maid mii gáttiimet leat guovdilis motiiva.
Identitehta lea čájáhusa guovdilis fáddá, leaš dal sáhka das mo mii hábmet iežamet identitehta sosiála mediain (Grethe Irene Einarsen), namalassii sámi kultuvrralaš identitehta (Tomas Colbengtson), dahje das mii gullá vássevaš ja njuovžilis identitehtii, nugo Trygve Luktvasslimo dáidagis. Maŋimusat namahuvvon prošeavtta lea vejolaš áddet dainna várra buot dovdoseamos muitalusain speadjala birra, namalassii myhtain Narcissusa birra, gii lei nuorahas ja ráhkistuvai iežas speadjalgovvii mii loahpas dagahii su jápmima. Sullasaš čuolbmačoahkit ihtet Camille Normenta dáidagis Driftglass, mii lea juogalágan vuostespeadjal, mas olmmoš čuččoda aiddo dan ovddabealde almmá oainnekeahttá iežas čielga gova. Speadjala logihka váilivuođa lea maid vejolaš oaidnit Bjørn Tore Stavanga duohtadili bodnji njuohtamiin. Hanne Grieg Hermansen bealistis sirdá fotográfalaš váikkuhusaid sárgumii dego deadjumat livčče vuolgán soaittáhagas.
Olbmuid deaivvadeamit iežaset birrasiiguin ihtet maiddái čájáhusa fáddán. Davviguovlluid eanadat čájehuvvo dievas čábbodagas Camilla Figenschoua dahkan oanehisfilmmas, muhto romántalaš ráfálašvuođa sajis mii oaidnit vuorddekeahtes ja muhtumin unohis gaskavuođalaš doaibmamiid. Dan Lestander maid luoitá iežas videoin olbmo mannat vuorddekeahtes gulahallamii luondduin. Sonja Siltala fotografiijain hámit áddestallet finnmárkolaš eanadaga leaikkastalli vuogi mielde, ja Ina Otzko fas diktá speadjaliid lanjadagas speadjalastit su iežas rupmaša muhtun fotoráiddus masa Hanne Bremnessa teavsttat ovttast doibmet veahkkin. «Reflex» prošeavtta lea vejolaš atnit identitehta dutkamin máŋgga dásis, sihke dáiddáris, geahččis ja dan eanadagas mas mii leat.
Kuráhtorat: Jan Erik Lundström ja Torill Østby Haaland
