ÁVVOČÁJÁHUS: RDM-Sámiid Vuorká-Dávviriin, Kárášjogas.
Čájáhusáigodat: 10/12/2020 – 06/06/2021
Dáinna čájáhusain háliida Sámi Dáiddaguovddáš ovttas RDM-Sámi Dáiddamágasiinnain ja Sámiid Vuorká-Dávviriin čalmmustahttit Oddmund Kristiansena čuohtejagi ávvudeami (riegádan geassemánu 2. beaivvi 1920, jápmán skábmamánu 20 beaivvi 1997).
DÁIDDÁR & DÁIDDA
Čájáhusas lea oasáš su viiddis grafihkka buvttadeamis, ja maiddái okta glássavajus. Livčče leamaš sávahahtti beassat čájehit ollislaš čájáhusa mii čájeha su dáiddalaš viidodaga njuohtamiin, glássavadjosiin, girjedáidagiin ja grafihkain mat ollismahttet su dáiddalašvuođa ovdanbuktojumi. Dát lea stuorebuš bargu mii sáhttá leat áigeguovdilin Sámi dáiddamuseai boahtteáiggis.
Son lei miellahttun Sámi Dáiddačehpiid Searvvis, SDSas, 1983 rájes (searvi álggahuvvui 1979s) ja son lei erenoamážit gudnejahttojuvvon miellahttu searvvi eará miellahttuid gaskkas. Son guđii davvi guovlluid árrat áigumušain háhkat alcces oahpu ja fidnet relevánta barggu, muhto ii vajáldahttán iežas duogáža davvin, mii boahtá čielgasit ovdan go son ollesolmmožin, 63 jahkásažžan, dieđihii iežas miellahttun SDSii ja oassálastii máŋggaid čájáhusain nugo omd. Davvinorgga dáiddačájáhusas máŋgga heave ja eará čájáhusain maid SDS ja Sámi Dáiddaguovddáš lágidedje. Kristiansen lei okta dain soađi maŋŋá dáiddáriin gii barggaid máŋggain iešguđetlágan ávdnasiiguin ja modernismma vuoiŋŋas.
1997s galggai čájáhus čájehuvvot Kárášjogas daláš Sámi Dáiddaguovddáš lanjain, ja lei suorggatlaš go Oddmund Kristiansen jámii seamma beaivvi go čájáhus galggai rahppojuvvot skábmamánu 28. beaivvi. Fáhkka jaskkodii dáiddárjietna mii lei leamaš doaimmas gitta lohppii. Loahpageahčen eallimis orui son Ommen-nammasaš báikkis Numedal:as. Son lei riegádan Báhccavuonas Romssa fylkkas, ja eatnis beale lei son sámi sogalaš.
Čájáhussii gullá gihpagaš dáiddára birra.
Teavstta jorgalan sámegillii: Marit Gunhild Sara.
Norsk Kunstnerleksikon: Oddmund Kristiansen
Omasvuona suohkan: Oddmund Kristiansen
Váldogovva: Monotypia 16/16, Oddmund Kristiansen, 1989. Govven: Anita Bjørnback / Sámi Dáiddaguovddáš.
Portreahttagovva: Oddmund Kristiansen govvejuvvon 1993s. Govva luoikkahuvvon Sámi Dáiddaleksikonas. Govven: Harry Johansen.
