Čájáhusa I Craft, I Travel Light loahppačalmmusteapmi:
Sotnabeaivve dii 13:00 ságastallaba kuráhtor guovttos Sigrid Høyforsslett Bjørbæk ja Charis Gullickson čájáhusa fáttá ja dálá áiggi dáiddaduoji ja dáidaga birra. Ságastallama láidesta Sámi dáiddaguovddáža direktevra.
Čájáhus lea johtán Arkhangelskas – Murmánskkas – Tromssas – ja loahpahuvvo Kárášjogas sotnabeaivve ođđajagemánu 28. beaivve. Čájáhusa lea buvttadan Norske Kunsthåndverkere Nord-Norge ovttasbarggus Davvi-Norgga dáiddamuseain. Čájáhusas oaidnit sámi, njeneca, ruošša ja norgalaš dáiddáriid dáiddadujiid ja dáidaga.
I Craft, I Travel Light čájáhus loktesta áigeguovdilin ja nanne dáiddaduoji stáhtusa, ja geahčada dáiddaduoji dáiddára čalmmiiguin. Kuráhtorat háliidit fuopmášuhttit árbevirolaš doaimmaid, sihke sámiid ja njenecaid kultuvrra ja eallinvuogi vuođul.
Makkár ávdnasiid geavahit, mo dat geavahuvvojit álgoálggus ja dasto ođđasit, ja gos dáiddárat vižžet inspirašuvnna? Gažaldagaide čatnasa birasgáhtten, johtti eallinvuogi gáhtten ja báikkálaš ja suvdilis valljodagaid geavaheapmi.
Mii guossohat gáffe ja gáffevuostá.
