Ingrid Becker, Marianne Broch, Cecilie Haaland, Aslaug Juliussen, Fedosya Semenovna Kauts, Gabriel Johan Kvendseth, Inger Anne Nyaas, Aleksei Ogorodnik, Solveig Ovanger, Outi Pieski, Anastasia Aristarhovna Pomyleva, Sergei Schemetov, Philipp Spillmann, Alexander Sverchkov, Martin and Anisia Fedotovich Taibarey, Viktoriya Vilka.

I Craft, I Travel Light – čájáhusa inspirašuvdna boahtá sámi kultuvrras ja eará davviguovlluid álgoálbmogiin, sin árbevieruin ja sin máhtus geavahit báikkálaš valljodagaid. Dáidagiid ávdnasat bohtet Barentsguovllu luonddus, nu movt beassi, guollenáhkki, bohcco čoarvi ja ođđasit ávkkástallojuvvon ávdnasat.

Čájáhusa namma čujuha subjektiivvalaš áddejupmái johttiálbmogiid duojis.

I Craft, I Travel Light fátmmasta maid birasgáhttema árvvuid, báikkálaš resursageavaheami, mainna eat goarit luonddu, ja johttiálbmoga eallima, mii heivehuvvo áigodahkii ja birrasii. Davviguovlluid giehtaduojit ovdanbuktet sihke árbevieruid ja ovdáneami, ja teknihkaid ja hábmema ođasmuvvama. Dáinna čájáhusain kuráhtor guovttos háliideaba boktit du fuomášit máŋggabealat estetihkalaš árbevieru, čájehit dan mearkkašumi dálá áiggis, nannet giehtaduoji identiteahta ja loktet dan stáhtusa ođđaáigásaš diskurssas. Sii háliidit deattuhit olbmuid gaskasaš deaivvademiid ja seailluhit kulturárbbi, giehtaduoji ja jaskes máhtu

Čájáhusain nannejit máhtu davviguovlluid birra, gos ođđaáigásaš doaimmat čuhcet árbevirolaš eallinvuohkái. I Craft, I Travel Light – čájáhusain servet áigeguovdilis ságastallamii mearraguovlluid ja eatnamiid oamasteames ja mo johttiálbmogat oidnet našuvnnaid ja rájáid. Fysihkalaš, politihkalaš ja ruđalaš dilit meroštallet mii joatkašuvvá boahtteáiggis ja guđe kultuvrrat bistet.

Čájáhus johtá Arkhangelska, Murmánskka, Tromssa ja Kárášjoga dáiddaásahusain. Čájáhusas beasat oaidnit sámi, njeneca, ruošša ja norgalaš dáiddaduojáriid bargguid. Čájáhusa sáhttá oaidnit Kárášjogas guovvamánu 2018 rádjái.

I Craft, I Travel Light – čájáhusa leaba kurateren Sigrid Høyforsslett ja Charis Gulliksen. Čájáhusa lea buvttadan Norske Kunsthåndverkere Nord-Norge ovttas Davvi-Norgga dáiddamuseain. Dat lea Norske Kunsthåndverkere -searvvi fáddáčájáhus 2017.

Čájáhussii ráhkaduvvo maiddái viiddis girji, mas leat ollu artihkkalat ja govat čájáhusain, prošeavtta bargobájiin ja vel eará.

Prošeavtta leat dorjon Norske Kunsthåndverkere, Norske Kunsthåndverkere Nord-Norge, Davvi-Norgga dáiddamusea, BarentsKult, Norgga kulturráđđi ja Fritt Ord.

Loga eambbo:

http://icraftitravellight.com/about

http://www.nnkm.no/nb/exhibitions/i-craft-i-travel-light

http://norskekunsthandverkere.no/aktuelt/i-craft-i-travel-light-til-tromso