Hábmet hámi čájáhusas deaivvadit dáiddárat geain lea nana oktavuohta hámiide ja materiálaide, ja maiddái vuoiŋŋalaš ja áiccolaš máhttui. Čájáhussii leat bovden muhtun dáiddáriid oassálastit ođđasat dáiddabargguideasetguin, ja maiddái muhtun dehálaš ja láidesteaddji dáidagiid luoikkahan RiddoDuottarMuseat-Sámi Dáiddamagasiinnas (RDM). Nu addá dát čájáhus ođđa ipmárdusa sámi dáidaga ovdanbuktinvuohkái, árbevieruide ja ovdáneami hárrái.
Čájáhusas leat dáiddárat Silje Figenschou Thoresen, Geir Tore Holm, Rose- Marie Huuva, Randi Marainen, Elly Mathilde Novvale Johnsen, Ann-Elise Pettersen Hyndøy, Raisa Porsanger, Alf Salo, Morten Torgersrud ja Kristin Tårnesvik.
Hábmet hámi čájáhusas buktojit ovdan dáidagat main lea guovddážis ávnnaslašvuohta, hápmi ja praktihkalašdáidu, seammás go dat maid fuopmášuhttet eahpemáilmmálašvuođa ja vuoiŋŋalašvuođa, dahje daid eahpeávnnaslaš árvvuid. Dáidagat sáhttet heivet oktii sámi dahje eará davviálbmogiid eallinvuohkái, dáidaga ovdanbuktinvuohkái ja máilmmioainnuide.
Dáidagiin eai nuge čájehuvvo identitehta- ja reálapolitihkalašfáttát, dat baicce válljejit eará luotta ja rahčet dan vuostá maid oarjemáilmmi njunušinstitušuvnnat čuvvot. Dát dáidda baicce luvve fámu muhtun lágan politihkalaš áiccolašvuohtan, mii dákko guorahallá dihto vuostálastima. Hábmet hámi čájeha dáidagiid mat dahket eanet go maid dat muitalit, ja jorralit eanet áiccuid ja duohta fenomenaid guvlui, dan sajes go vásáhusdieđuid guvlui. Hábmet hámi čalmmustahttá hámi etihka sámi (ja árktalaš davveguovlluid) modernismmas.
Oktiibuot 10 dáiddára oassálastet iešguđet hámat dáidagiiguin. Hábmet hámi vuolggasadjin lea Kristin Tårnesvika installašuvdna Feltarbeid (Gieddebargu), mas leat báhpárii sárgojuvvon eaŋkilsárgát, oktiibuot 20 peannatevnnega oktii biddjojuvvon stuorra matriisan. Eaŋkil sárggis máŋgejuvvo, geardduhuvvo ja šaddá hápmin, ja go hámit ovttastuvvet hámiiguin, de riegádit ođđa hámit.
Hábmet hámi sisdoallá maiddái Silje Figenshou-Thoresena Varanger-funnene (Várjjat- gávdnosat) mas sárggis ja sárgu giehta hástaluvvo ja geahččaluvvo, muhto maiddái leat arkeologalaš sárgojumit vuođđun, ja mat eai nuge geardduhuvvo dahje áddestallojuvvo, muhto baicce oalát rievdaduvvojit dahje biđgejuvvojit.
Morten Torgersruda čavges, várrugas govvaráiddus leat arkitektonalaš hámit, ja mat bajidit gealdagasa gova báikkálaš ja eahpebáikkálaš gullevašvuođa gaskka.
Raisa Porsangera instállašuvnnas Hexaëmeron/Muohtačalmmit leat earret eará “balvvat”, báidnojuvvon bohccoduoljjebihtážat ja seaidnái málejuvvon čalbmái čuohci čuvgesrukses govva. Su dáidagis lea hábmi dárkilit duddjojuvvon ja dat lea optihkalaččat geasuheaddji.
Muhtun oassi daidagiin leat daid bovdejuvvon dáiddáriid dáiddabarggut luoikkahuvvon Sámi Dáiddamagasiinnas, nu go; Geir Tore Holm, Rose-Marie Huuva, Elly Mathilde Novvale Johnsen, Randi Marainen ja Alf Salo.
Čájáhuskuráhtorat: Hilde Methi ja Jan-Erik Lundström.
SDG giitá RiddoDuottarMuseaid dáiddagiid luoikama ovddas.
Giitit maiddái Videokunstarkivet ja Martin Johan Bengtssona.
Kristin Tårnesvikii lea geigejuvvon Statens utstillingsstipend (Stáhta čájáhusstipeanda).
