ČÁJÁHUS: Gollegiisá — Skattekiste — Treasure Chest!
50-jagi čohkkáldat dáiddas Kárášjogas.
Dán jagi ávvuduvvo Sámiid Vuorká-Dávvirat RDM/SVD 50-jagi. Musea rahppui 1972:s ja das leamašan stuorra mearkkašupmi báikkálaččat, regiuvnnalaččat ja nášuvnnalaččat.
ÁVVUDEAPMI 2022
Jagis 2022 ávvudit musea vuosttas 50-jagi. Ávvudeame oktavuođas lea maiddái áigi geahčastit sihke maŋás ja ovddos guvlui. Álggu rájes, 1972:s lei juo dáidda oassin musea oastimiin. Ánddir Ivvár-Ivvára/Iver Jåks rohki seaidnečikŋa lea okta daid dáidagiin, ja man musea galledeaddjit dalán deivet go vistái lávkejit. RDM/SVD ostii jagis 1972 maiddái Ánddir Ivvár-Ivváris dáidaga mii čájehuvvo ávvočájáhusas.
Sámi Dáiddaguovddáš háliida oassálastit 50-jagi ávvudeapmái. Dán guovtti ásahusas, SDG ja RDM/SVD:s leat lagáš ovttasbargo čanastumit fágalaččat ja dáiddapolitihkalaččat. Mii bargat seamma olahusmihtuiguin – nannet sámi dáidda ja kultur čájeheami ja gaskkusteami. Dasa lassin lea mis oktasaš ulbmil, ahte sámi dáiddačoakkáldat man RDM/Sámi Dáiddamagasiidna hálddaša, galgá oažžut bissovaš čájáhuslanjaid boahttevaš sámi dáiddamuseas. RDM/Sámi Dáiddamagasiidna vurkkoda earret RDM/SVD dáidagiid maiddái dáidagiid mat gullet SDS (Arts from the Arctic), dalá Sámi Kulturráđi oastimiid, dáiddaoastimiid Norgga Kulturráđi doarjaga bokte ja Sámedikki dáiddačoakkáldaga, ostojuvvon Sámedikki dáiddaoastinortnega bokte. Sámi Dáiddačehpiid Searvi, SDS lea jagi 1979 álggu rájes bargan oččodit bistevaš dáiddaoastinortnega, ja man odne ruhtada Sámediggi, Dat alla árvosaš stuorra dáiddačoakkáldat gullá dan boahttevaš sámi dáiddamuseii.
GEASSEČÁJÁHUSA 2022 BIRRA
Sámi Dáiddaguovddáš searválaga RDM/Sámiid Vuorká-Dávviriin ja RDM/Sámi Dáiddamagasiinnain bovdejit olbmuid dán jagáš stuorra geassečájáhussii. Dáidagiid duogábealde leat máŋga buolvva sámi dáiddárat geat barget iešguđet visuála šáŋŋeriin. Kuráhtorat leaba Hilde Skancke Pedersen ja Kristoffer Dolmen. Soai leaba vuoruhan dáidagiid main boahtá máŋggabealatvuohta ovdan. Čájáhusas, mii juhkkojuvvo fáttáid mielde, oaidnit dan erenoamáš čoakkáldaga man almmolašvuohta eaiggáduššá. Čájáhusas leat sihke odná ja ovddeš dáiddáriid dáidagat, nuorat gearddis gitta boarrasat geardái. Nu go dávjá sámi oktavuođain, de leat dássedis dáiddalogut gaskal nisson- ja almmáidáiddár bargguin. Dáiddačoakkáldat lea stuoris, ja danin leat vuoruhan govvadáidaga. Čájáhusnamma, Gollegiisá, lea vižžojuvvon Kárášjohtnissona Inga Nordsletta Pedersena dáidagis.
Čájáhus čalmmustahttá 50-jagi ávvudeami, muhto dat čujuha maiddái ovddos guvlui, ja čájeha makkárin boahttevaš sámi dáiddamusea vuođđočájáhus sáhtašii leahket. Gollegiisá čájáhusain ávvudat Sámiid Vuorká-Dávvirat ja RiddoDuottarMuseat, ja das geasset vel ovdan dan valljivuođa ja givrodaga mii sámi dáiddasuorggis lea.
Dáiddárat čájáhusas:
Matti Aikio, Eva Aira, Jon Ole Andersen, Viktoria Andersson, Inger Blix Kvammen,
Thomas Colbengtson, Daban Da (Rognli/Forsøget), Eva Delving-Wiklund, Monica Edmondson, Folke Fjällström, Asbjørn Forsøget, Aage Gaup, Bente Geving, Hanne Grieg Hermansen, Gerd Grimsø, Josef Halse, Marja Helander, Geir Tore Holm, Andreas Holtung, Rose-Marie Huuva, Arnold Johansen, Harry Johansen, Lars Johansson-Nutti, Annelise Josefsen, Aslaug Juliussen, Per Isak Juuso, Iver Jåks, Oddmund Kristiansen, Gerd Lorås, Johanne Losoa Larsson, Trygve Lund Guttormsen, Britta Marakatt Labba, Hans Ragnar Mathisen, Unni Myrseth, Mathis Nango, Nils Nilsson Skum, Inga Nordsletta Pedersen, Elly Mathilde Novvale, Synnøve Persen, Outi Pieski, Lars Pirak, Gjert Rognli, Alf Magne Salo, Máret Ánne Sara, Andreas Sarri, Irja Čiekča Schmidt, Hege Siri, Odd Sivertsen, Lena Stenberg, Anders Sunna, Ingunn Utsi ja Nils Aslak Valkeapää.
RAHPAN
Čájáhusrahpan lávvardaga miessemánu 28. Beaivvi, diibmu 18:00. Čájáhusain dahkat maiddái earrodearvvuođaid SDG-direktevrain Kristoffer Dolmen, guhte loahpá 4-jagi mearreáiggevirggis geasset.
