Matti Aikio dahkan videoriggehat, man namma lea Building Nomad Refugee Camp, lea álbmás, vuorddekeahtes ja muosáhahtti dáidda. Das bárgiduvvojit lahkavuohta ja báhtareapmi, máhtut ja niegut.
Sámi Dáiddaguovddáš, Šami dáláš dáidaga guovddáš bovde olbmuid erenoamáš dáiddamuosáheapmái maid mii oanehis áiggi čájehit ovddeš DSF-visttiin Kárášjogas.
“Building Nomad Refugee Camp” videoriggehat šaddá gussiide leat muhtunlágan vurkkodansadji dušše soaittáhagas, mas leat ee. duoljit ja TV-apparáhtat. Das lea video-kvartehtta mii čájeha johttisámiid kultuvrra, gumppe bivdin bohccuid, vávastuhtti čáppa lávddástallama mas leat garrasit borggisteaddji sávdnelávvu ja ásodaga latnjagálvvut, ja mas gávpotlaš eallin boahtá oktii luondduin, mas dáiddár dahje báhtareaddji deaivvada badjeolbmuiguin ja bivdiiguin. Vurkkodansadji, mii sáhtášii leat sihke báhtareaddjiidleaira ja seammás maiddái johttisápmelaččage dábálaš muhto soaitimis šaddan vurkkodansadji, čájehuvvo leat gittalagaid friddjavuođabáikkiin, namalassii dorvolanjain, go guhkes sevdnjes tunealla manná dasa, mii maid mearkkaša boktaleaddji ja ovddolaš ovttastumi luondduin mearehuttakeahtes birrasiin.
Dainna oktanaga seamma ja boddasaš čájáhuslanjas čájehuvvo maiddái Ekaterina Kravtsova ovdanbuktin, su gii lei vuosttamuš dáiddár guhte Artist-in Residency Prográmma mielde orui Ivvár Ivvára viesus. Kravtsova lea Kárášjogas leamaš viesu gudneássi suoidnemánu gaskkamuttu rájis. Maid son dás buktá ovdan, čájeha su dáláš barggu mii ii leat vel gárvvis. Work in Progress plánejuvvui ja álggahuvvui go son lei guossis Kárášjogas.
Dát guokte čájáhusa leat olbmuide rabas duššefal oanehis áiggi ja gaskaboddasaš lanjain, namalassii das mii ovdal lei Sámi Álbmotallaskuvlla váldovisti gasku Kárášjoga márkanbáikki.
