Omni Anima – jienat nuppi máilmmis
Dološ deaivvada boahtteáiggiin OMNI ANIMAS – mas sierra dáiddasuorggit ovttastuvvojit, go sámi juoigi, Torgeir Vassvik ja dáiddár Ståle Stenslie ovttasbargaba. Prošeavttas árbevirolaš luohti transformerejuvvo interaktiiva, elektrovnnalaš mediaiguin, luohti nannejuvvo ja láhččojuvvo dálá áiggi musihkkan, seammás go juoigan gáhttejuvvo dáiddahápmin.
Prošeavtta ulbmil lea earret eará geavahit ođđa teknologiija ja dainna gaskkustit ja fievrridit viidáseappot boares juoiganvugiid ja čottalávlunvugiid interaktiiva ja multikanála jienain (holofoniijain).
Latiinnagiela sániid Omni Anima sáhttá dulkot dan láhkai ahte juohke diŋggas lea siellu. OMNI ANIMA iská oažžut guldaleddjiid tránsii nu mot noaidi dagai juoigamiin. Tránssas noaidi sáhttá sáddet sielus vuoiŋŋaid máilbmái, Sáivui. Prošeavtta interaktiiva rumbu geaidu jietnavásáhusaid, mat addet sielu, mat boktet eallima guldaleddjiin ja guldaleddjiid bokte.
Árbevirolaš juoigama vuođul OMNI ANIMA geaidu jietnavásáhusaid, main dološ luohti rievdá interaktiiva, multikanála jietnavuogádagain (holofoniijain). Elektrovnnalaččat modifiserejuvvon, interaktiiva ja hearkkes sámi rumbu ráhkada luođi golmmaollilaš jietnamáilbmái.
Torgeir Vassvik (r. 1962) vástida prošeavtta musihkabealis ja Omni Anima komponeremis. Son lea sámi komponista ja vokalista, gii ovttastahttá juoigama ja čottalávluma rumbbuin, árbevirolaš čuojanasaiguin ja luonddujienaiguin.
Muhtumat leat gohčodan su «jietnageaidun» (The Sound Magician). Vassvika skearrut Sáivu ja Sápmi leat ožžon buriid árvvoštallamiid.
Ståle Stenslie (r. 1965) lea Elverumas eret ja lea hábmen prošeavtta ollašuhttima. Ståle Stenslie lea norgalaš dáiddár ja kuráhtor, geas lea ph.d. Oslo arkitektuvra- ja designallaskuvllas (2010). Son lea dáiddabarggus olis gállán ođđa luotta riikkaidgaskasaš elektrovnnalaš dáiddalávdái. Son lea maid ráhkadan ja láhčán čájáhusaide kognišuvnna ja persepšuvnna manipulerejeaddji dáiddaprošeavttaid, main laktateknologiijat (interface-teknologiijat) ja ođđa, digitála reaiddut leat bidjan rámmaid su bargguide dáidda-, media- ja fierpmádatdutkama suorggis.
Thom Johansen, Notam, vástida teknihkas ja programmeremis.
Prošeakta rahppojuvvo dáiddaloaiddastemiin čakčamánu 2. beaivve. Installašuvnna sáhttá oaidnit 22.10.2017 rádjai.
