Kristoffer Dolmen lea Sámi Dáiddaguovddáža ođđa direktevra. Son álgii geassemánu 1. beaivvi 4-jagi mearreáiggevirgái.
“Mun illudan beassat viidásat ovdánahtit dáiddaguovddáža.” cealká son.
Kristoffer Dolmen lea ođđa direktevra Sámi Dáiddaguovddážis, ja son lea barggus Kárášjogas 23. vahku rájes. Kristoffer Dolmenis lea guhkes dáidda- ja kultursuorgeduogáš Davvi norggas, ja son boahtá dáidda- ja kulturráđđeaddivirggis Nordlándda fylkkasuohkanis.
“Mu sávaldat lea ahte Sámi Dáiddaguovddážis galgat ain joatkit buriid čájáhusaid čájehit ja lágidit miellagiddevaš doaimmaid mat geasuhit gehččiid, ja maiddái ovttasbargat eará ásahusiaguin Norggas ja olgoriikkas. SDG:s lea dehálaš bargu olahit sámi dáidagiin máilbmái. Mun illudan beassat dáiddaguovddáža viidásat ovdánahttit ovttas guovddáža bargiiguin,” lohká ođđa direktevra.
Kristoffer Dolmen lea bargan Bodø kunstforeningas “Bådåddjo dáiddasearvvis” (2001 – 05) čájáhusbuvttaddeaddjin ja gaskkusteaddjin. Son leamašan prošeaktajođiheaddjin Den Nordnorske Kunstutstillingas “Norgga Dáiddačájáhusas” (2001 – 05), lea maiddái bargan čájáhusgeardomátkkiiguin, prográmmabargin ja doaibman dáiddamagasiinnas Se Kunst i Nord-Norge (2005-08). Jagi 2008 rájes lea son doaibman dáiddafágasuorggis Nordlándda fylkkasuohkanis, gos sus lei ovddasvástádus máŋggaid stuorit prošeavttain ja vuoruhuvvonsurggiin nu movt Kunst i offentlig rom “dáidda almmolašlanjas” Skulpturlandskap Nordland “Nordlándda bázzeaeanadat”, AiR Nordland (kunstneropphold) “dáiddárorrumat”, Artist in Residence fierpmádt báikkit Nordlánddas, ja dasa lassin máŋggat čájáhusat, konferánssat ja eará lágideamit leamašan oassin su bargguiguin.
Dolmenis leamašan maid stivradoaimmat AdLib Jazzklubbas, ParkArtas ja Ny Musikk-Bodøas.
Sus lea Mastergráda hábmejeaddji kuráhtorgeavatlašoahpus ja Cand. Mag. gráda Bergen Universitehtas fágasurggiin dáiddahistorjjás, kulturgáhttemis ja kulturgaskkusteamis. Dolmenis lea maiddái Museadieđaoahppu ja Cultural Management Stockholm Universitehtas, ja lassin vel Sámi kulturmáhttokursa mas Julevsámeguovlu lei deattan.
– “Mun lean aktiivvalaččat bargan Barentsguovllu fierpmádagain ja lean geahčastan nuorttas, erenoamážit jurdagiin ahte Davvikálohtta ja Davvioarje-Ruošša livččejit miellagiddevaš ovttasbargoguovllut. Sápmi ja sámedáiddárat gullet guovddážii dakkár ovttasbarggus, seammás gullet maiddái dáiddárat geat ásset davviriikkain ja geain lea gullevašvuohta sámi dáiddárbirrasii. SDG buori čájáhuslanjat Kárášjogas addet nana rámmaid čájáhusaide ja prográmmadoaimmaide. Seammás háliidan geahčastit viidát olggobeale ovttasbargovejolašvuođaide ja gaskkustit čájáhusaid eará báikkiin, nu go dahkkui ovdamearkkadihte Tråante 2017:s ja Documenta 14:s”, čilge son virgái álgima oktavuođas.
Lasi dieđut leat fidnemis Sámi Dáiddaguovddážis. Jearahallama sáhttá šiehtadit Kristoffer Dolmeniin, tel. +47 910 09 705, e-poastačujuhus kristoffer@samidaiddaguovddas.no
