Te Whare Pora: A Sacred Space ovdanbuktá Maungarongo (Ron) Te Kawa ođđa dáiddabargguid maŋimuš golmma jagi áigodagas. Son lea eret Ngāti Porous, Aotearoas/Ođđa Selánddas. Čájáhusas leat maid golbma ođđa dáidaga, mat speadjalastet su mávssoleamos pou-čuolddaid: Te Whare Pora, bassi duddjonsadji; Hineteiwaiwa, luovvalasvuođa atua (ipmilvuohta); ja Waipunarangi, máttuid bagadallama ja inspirašuvnna gáldu.
Ron Te Kawa lea guoktelot jagi guorahallan mātauranga Māori (máhtu) ja iežas whakapapa (sohkamuora) dáiddabargguinis. Sus lea iežas stiila, mainna liidnebihtáin goroda ivdnás dáidagiid ja geavaha ávdnasiid taktiila vugiiguin, čuovokeahttá árbevirolaš bihttabihtatvuogi njuolggadusaid goarodettiinis oktii iešguđetlágan tekstiillaid. Visuálalaččat erenoamáš dáiddabarggut ovdanbuktet dávjá dáiddára miellagovahusa duovdagiid, muhto maiddái su iežas vássán áiggi ja su eallimii mávssolaš olbmuid muitalusaid.
Ron Te Kawas lea dáidaga ráhkadeamis áidnalunddot energiija ja aroha (ráhkisvuohta), ja kompromissekeahtes demokráhtalaš lahkonanvuohki. Nuba Te Whare Pora: A Sacred Space -čájáhus speadjalastáge te ao Māori (maoriid máilmmi) mávssolaš jurdagiid. Ron Te Kawa gudnejahttá dáidagiiddis bokte vugiid, maiguin álgoálbmogat leat, oidnet ja barget, ja dovddasta erenoamážit sámi dáiddáriid ja dáiddaduojáriid. Dan láhkai son láhčá saji oktasašvuhtii, mas juogadit vásáhusaid ja čatnat ođđa báttiid.
Kuráhtor: Zoe Black (Ngāpuhi, Ngāti Hine, Pākehā) Čájáhusdesign: Turumeke Harrington (Kāi Tahu, Rangitāne, Ngāti Toa Rangatira)
