Čájáhusas lea muorra váldoávnnasin, ja dan geavaheapmi guorahallojuvvo sihke bacce- ja objeaktadahkamis. Sámis lea dat árbevirolaš ávnnasgeavaheapmi erenoamáš sihke dáidagis ja duojis.
Čájáhusáigodat 24.01.-24.02.2019
Ivvar Ivvár/Iver Jåksas leamašan erenoamáš mearkkašupmi sámedáidaga ovdáneamis, go son han lei stuorra dáiddár ja gii lea inspireren eará sámedáiddárii geat su maŋis bohte. Dát čájáhus lea dat vuosttasoassi dan golmmaoasát čájáhusaráiddus dálvvi ja giđđadálvvi mielde, ja mat čalmmustahttet sámedáiddáriid bargovugiid, 3-olat dáiddabargguid, objeavttaid, bácciid ja instalašuvnnaid bokte. Dáiddárat čájáhusas: Jovn’Ovllá – Jon Ole Andersen, Folke Fjällström, Aage Gaup, Annelise Josefsen, Per Isak Juuso, Iver Jåks, Håvard Larsen, Max Lundström, Randi Marainen, Margrethe Pettersen, Maj-Lis Skaltje ja Ingunn Utsi.
Dáidagat čájáhusas leat luoikkahuvvon RDM-Sámi Dáiddamagasiinnas. Dat golbma čájáhusa čájehuvvojit buohtalaga Aase Texmon Rygh modernisttalaš báccečájáhusain.
Time for Sculpture / Muoras – árdnan čájáhusa lea kurateren: Kristoffer Dolmen, SDG direktevra.
Čájeheapmi lea ovttasbargu gaskal SDG ja RiddoDuottarMuseat.
Dáiddárat čájáhusas:
Jon Ole Andersen (r. 1932) Horbmás dalá Buolbmát gielddas eret, otne Deatnu. Son lea iešoahppan duojárin, ja guhká barggai son eará fidnosurggiin, earret eará Sámiid Vuorká-Dávviriin, muhto lea maŋimuš jagiid bargoeallimistis leamšan ollesáiggeduojárin ja dáiddárin ovdal go lávkii ealáhahkii. Muorra lei váldomateriálan su duodjebargguiguin, muhto son lea maiddái duddjon johkafatnasiid sisttis.
Folke Fjällström (r. 1940) dáiddaduojár ja bázzedahkki. Son ássá ja bargá Vålådalenis Jämtlandda leanas, ja sus lea máttasámi duogáš. Son lea bargan máŋggaid stuorra almmolaš bázzedahkamiiguin, o.m.d. sámebázzepárkkain Johkamohkis. Fjällström bargá árbevirolaš dujiiguin, ja duddjo niibbiid ja eará atnubiergasiid. 2017s dagai son sámehámat áltároasi muoras Nidarosdomenii.
Aage Gaup (r. 1943) Bissojogas Porsáŋggus eret, otne ássá son Kárášjogas. Gaup lea vuostamužžan bázzedahkkin ja bargá muorain, betoŋŋain ja alumiinnain, ja son dahká almmolaščiŋahemiid ja bargá galleriijačájáhusaiguin. Son lea maiddái olu dahkan lávdehábmemiid. Dáiddaoahppu: Kunstakademiet i Trondheim, avdeling skulptur (Dáiddaakademiija Troandimis, čuolahusossodat).
Annelise Josefsen (r. 1949) mearrasápmelaš Jáhkovuonas Fálesnuori suohkanis eret. Son bargá iešguđetlágan teknihkaiguin, muhto lea eanemus dovddusin bázzedahkkin. Son lea máŋggaid almmolaščiŋahemiid dahkan ja maiddái oassálastán moanat čájáhusain. Dáiddaoahppu: Vestlandets kunstakademi (Vestlándda dáiddaakademiija).
Per Isak Juuso (r. 1953) Mertajávrris Gáresavvonis eret. Son lea bajásšaddan boazodoalus ja oahpai juo mánnán duddjot ruovttus. Son válddii oahpu metállabarggus ja hábmemis, lassi oahppu lea sus pedagogihkas Sámi Allaskuvllas Guovdageainnus. Juuso bargá metállaiguin, muoraiguin, čorvviiguin ja tekstiillaiguin, ja son leamašan njunožis ásaheamis ođđaáigásaš sámedáidasuorggi – dáiddaduoji.
Iver Jåks (r. 1932 – j. 2007) asái eanaš áiggi eallimisttis Kárášjogas, muhto sus lei maiddái 1990-logu rájes ásodat Romssagávpogis. Romssa Universitehta nammadii Jåks namas Artist in Residence guossedáiddárprográmma mii fállá dáiddáriidda guovttemánnui Kárášjogas bargolanjaid ja ásodaga, lassin vel gullá bargostipeanda dasa. Jåks dáiddáreallin lei guhki ja girjái. Iver Jåks lea erenoamážit dovddusin muorra ja čoarve bázzedahkamiid dihtii, ja dagai moanaid almmolaščiŋahemiid (máŋggat čiŋaheamit leat Kárášjogas). Dáiddaoahppu: Statens håndverks- og kunstindustriskole (Stáhta giehtaduodje- ja dáiddaindustriijaskuvla) ja Kunstakademiet i København (Dáiddaakademiija Københámmanis).
Håvard Larsen (r. 1955) Návuonas eret, otne ássá son Balsfjordas Romssa suohkanis. Larsen lea eanemusat dovddusin daid nana sámeniibbiidis dihtii maid duddjo árbevirolaš vuogi mielde, muhto son duddjo maiddái olu eará adnubiergasiid, rumbbuid, objeavttaid ja bácciid, ja atná muora, čoarvvi, dávtti, sistti, náhkki ja metálla duodjeávnnasin. Larsen lea maŋimuš áiggis álgán maiddái njuohtat luonddugovaid.
Max Lundström (r. 1950) ruoŧa-sámedáiddár, riegádan Tåsjöas, Västernorrlándda leanas. Lundström ássá ja bargá Volgsele stášuvnnas, nuortadavábealde Vualtjere. Son lea bargan giehtaduojárin 1985 rájes ja muorra lea váldoávnnas su dujiin. Max lea erenoamžit bargan ovddidit dan hábmengiela sámeduojis.
Randi Marainen (r. 1953) Bissojogas Porsáŋggus eret, otne ássá son Vuolit Sohpparis. Marainen lea silbarávdi ja dáiddár. Son gohčoduvvo multidáiddárin daningo bargá máŋggalágan ávdnasiiguin, ja duddjo sihke čiŋaid ja ádnubiergasiid, objeavttaid ja bácciid. Oahput: silbarávdin oahppan Gispert Dunkeris Guovdageainnus ja duodjeoahpu váldán Samernas folkhögskolas mii maŋŋil molssui nammii Samij Åhpadusguovdásjin, Johkamohkis.
Margrethe Pettersen (r. 1977) Romssas eret. Dáiddaoahppu: Kunstakademiet i Troms (Dáiddaakademiija Romssas) ja Kunsthøgskolen i Oslo (Dáiddaallaskuvla Oslos). Pettersen bargá proseassaiguin ja dávjá geavaha válljejuvvon báikkiid luonddus dahje gávpogis gos son dahká báikái dáidagiid, ja maiddái ovttastahtá dáidagiidis jietnadáidagiiguin ja jietnaintasllašuvnnaiguin. Son lea inspirašuvnna viežžan muitalusaiguin mat govahallet su sámemáttuid.
Maj-Lis Skaltje (r. 1940) Báste čearus, Jielleváris eret, otne ássá son Puoltsas Gironis. Lea guhká bargan sámeprográmmaiguin Ruoŧa radios ja TVs. Ollesolbmoagis válddii dáiddaoahpus Bildkonstakademin Helssegis ja 1990-logu rájes lea son bargan dáiddárin. Son njuohtá govaid ja dahká čullosiid/bácciid.
Ingunn Utsi (r. 1948) Reiffvágis Davvinjárggas eret. Dáiddaoahppu: Kunstskolen i Trondheim, ja bargá iešguđetlágan teknihkaiguin, muhto son lea eanemus dovddusin bázzedahkkin ja geavaha riehkki ávnnasin ja man ovttastahttá eará ávdnasiiguin nugo plastihkka, mála, náhkki jnv.
