Lávvardaga čakčamánu 7. beaivve lea gelddolaš dáiddár ovdanbuktin ja dáiddárságastallan gaskal norgga-kurdárlaš dáiddára Kwestan Jamal Bawan ja sámedáiddára Hilde Skancke Pedersen. Soai leaba goappašagat ráves nissonat geat maŋŋit eallimis leaba ožžon rámi iežaska dáidagis. Goappašagat geavaheaba iešguđetlágan teknihkaid barggustis, ja dađistaga guorahallaba ođđa ovdanbuktin vugiid. Soai leaba goappašagat nana ovddasvázzit ja ovdáneaddji dáiddárat.
Kwestan lea Kurdistanas eret, ja nu go sápmelaččatge, de ellet kurdárat njealji riikkas. Kwestan ráhkada abstrákta dáidagiid mat liikká nagodit govvidit kurdáriid dili ja sin friddjavuođa ohcaleami. Su dáidagiid lea earret eará Bergen dáiddamusea KODE oastán.
Hilde lea dovddus ollugiidda Sámis, Sámedikki feaskir- ja dievasčoahkkinlatnja dáidagiid dihte, ja lea dál ain áŋgirat dáiddár go goassege ovdal. Hilde lea dáid beivviid gárvemin ovtta stuorra dáiddaprošeavtta mii lea dan ođđa buohcceviesus Hámmárfeasttas, ja sus leamaš maiddái olu čájáhusat sihke Norggas ja olgoriikkain.
Dáiddárat illudit deaivvadit ja háleštit olbmuiguin Kárášjogas. Bures boahtin Sámi Dáiddaguovddážii (SDG) lávvardaga čakčamánu 7. beaivve dii. 13.00. Mis lea veháš guossoheapmi. Bures boahtin!
Govvateaksta: Hilde Skancke Pedersen installašuvnnain “Guovdageainnu áhkkut”. Govven: Tove Kristiansen.
Govvateaksta: Kwestan Jamal Bawan. Govven: Thor Brødreskift
