Charlotte Nilsen ja Gerd Wevling Matre deaivvadeigga studeantan Duodje- ja dáiddaallaskuvllas Oslos 1998:s. Dan rájes soai leaba doallan lagas oktavuođa nubbi nuppiin ja leamašan deaŧalaš rollas goabbat guoimmiska eallimiin ja bargguin.
Charlotte Nilsen gođđá ránuid sávzzaullus; čuhppon, kárejuvvon, badnojuvvon ja ivdnejuvvon unna Acersif-nammasaš gilážis Marokkos. Doppe son ovttasbargá njealji duojariin geat gullet Tamazight-eamiálbmogii. Ovttas sii leat ealáskahttán batninteknihka mii lei measta vájalduvvon.
Gerd Wevling Matres lea dállu ja sávzzat Sarpsborgas, ja son čohkke ávdnasiid iežas dáiddabuvttadeapmái dálu birrasis. Son čuollá muoraid maid son bálkesta sávzzaide ja de čoaggá fas ovssiid main šibihat leat jursán bárkku eret.
Goappáge dáiddára geavadagat leat vuođđuduvvon guhkes kreatiiva proseassaide ja persovnnalaš muitalusaide.
Soai čájeheaba hearkivuođa, ávdnasiid historjjá ja luonddu váikkuhusaid, mat mearkkašit ollu guktuid dáiddalaš ovdanbuktimiin ja sudno eallin ja barggut leat čuoldásan oktii.
Dán čájáhusas Sámi dáiddaguovddážis čájeheaba Charlotte Nilsen ja Gerd Wevling Matre vuosttaš geardde iežaska dáidagiid ovttas.
Čájáhusa kuráhtor lea Siri Ensrud
