Susan Hillera videoprošeavttat ovdanbuktet guorahallamiid vuođul daid uhkiduvvon ja ealáskahttojuvvon gielaid dili.

Susan Hillera filmmain Láhppon ja gávdnon (2017) ja Maŋimuš jávohis ealligovva (2009), beasat gullat olbmuid hállamin jávkan, uhkiduvvon ja ealáskahttojuvvon gielaid. Goappašiid filmmain deaividat olbmojienaiguin mat guoskkahit du iešguđetge láhkai; muhtimat lávlot, máinnastit, báibmet sániid, muittašit, dálkedieđuid muitalit dahje digáštallet biilaváttisvuođaid birra.

Dáid oanehis muitalusaid, lávlagiid, digáštallamiid ja muittuid bokte, juogadit muitaleaddjit minguin juoga mas čađat lea gielas sáhka. Gielaide leat čadnon losses morašlašdovddut main leat referánssat kolonialismii dahje ođđaáigádeapmái, ja mat leat daid gielaid dagahan dan dillái masa dál leat šaddan.

Filmmain beasat čuovvut doarggisteaddji oscillográfa jietnasárgágovaid mat visuálalaččat čájehit mo jietna čuodjá olbmo rupmaša čađa. Dát lea dakkár oppamáilmmálaš olbmovásáhus, beroškeahttá áiggis, báikkis dahje dan dilálašvuođas mas olmmoš lea.

Susan Hiller (riegádan 1940, Tallahassees, Floridas. Ássá ja bargá Londonis) -lea váikkuheaddji pionera video- ja multimedia dáiddasuorggis. Son lea eanemus dovddus vuorká konseaptadáiddabargguiguin. Psykologalaš fáttát leat guovddážis su dáiddabargguin,
soahtemuitobácciid rájes gitta eahpemáilmmálaš fenomenaide.

Filmmat čájehuvvojit buohtalagaid Sissel M Bergha sierračájáhusain Okside rïhpesieh.