Preassadiehtu

Sámi Dáiddaguovddáža (SDG) stivra lea virgádan Line Kalak SDG jođiheaddjin.

Kalak lea vuosttaš SDG vuosttaš sámi jođiheaddji dan rájes go SDG šattai vuođđudus, badjel logi jagi áiggi.

Kalak boahtá Sámi allaskuvllas Guovdageainnus, gos lei allaskuvlalektor riektediehtagis, ja gos lea maiddái leamaš prorektor earret eará duodjediehtaga dutkamis ja oahpahusas.

Son lea jurista, ja lea maiddái oahppu antropologiijas, ekonomiijas, prošeaktajođiheamis ja jođiheamis.

Kalakis šaddá lagas ovttasbargu SDG dáiddalaš ráđiin, gos leat dáiddárat geaid Sámi Dáiddačehpiid Searvi lea nammadan.

SDG stivra illuda Line Kalakiin ovttasbargat min dáiddaguovddáža, dáidáriid ja sin dáidagiid buoremusa ovdii, ja nu maiddái dáiddaguovddáža gussiid fágačehpiid ovdii.

SDG stivrra jođiheaddji lea Hilde Skancke Pedersen (SDS), Ja eará stivraláhttut leat Lene E Westerås (SDS), Katarina Spik Skum (SDS), Henrik Olsen (Sámediggi) ja Svein Atle Somby (Kárášjoga gielda).