Tonje Plur (r. 1985 Oslos) orru ja bargá Oslos. Sus lea sváinnasbreva čuvla- ja eará nisson bivttas guorrumis ja mastergráda bivttashábmemis Kunsthøgskolen i Oslo-allaskuvllas. Su dáidagiid vuolggasadjin orrot álo leamen rumaš ja bázzi. Dáidagiiddis son hápme tekstiillain, gođđosiin ja iešguđetlágan goarrunvugiin, ja son guorahallá mo gárvodeami ja bivttasvieru sáhttá oaidnit viidásat fenomenan. Son suokkardallá mo biktasat geavahuvvojit gulahallamin ja mo bivttasmálle muitala juoidá min áiggi, olbmuid, identitehta ja gullevašvuođa birra
Dán čájáhusas Plur guorahallá olbmuid, olbmuid birrasiid, tekstiillaid ja birrasiid gaskavuođaid. Son suokkardallá mo báikkit gos mii orrut váikkuhit midjiide ja báidnet min, ja maiddái mo dálá eallináigámet váikkuha midjiide. Dát ollislašvuohta boahtá oidnosii golbmadimenšunála dáidagiin ja fotografiijjain. Dáidagat leat tekstiiladulkomat birrasiin, gos Plur lea ieš leamaš oanehat dahje guhkit áiggi, iešguđetge áiggis jándoris miehtá jagi. Son lea ráhkadan daid ovddit prošeavttain báhcán ávdnasiin, ávdnasiin maid lea gávdnan, ja biktasiin mas oktage ii šat fuola. Dáin Plur lea hápmen ođđasit čavges čuolmmaid ja guhkes báttiid. Olbmo rupmaša vuođul son lea hábmen ávdnasiid nu ahte dain sáhttá gárvodit, ja dan láhkái olmmoš šaddá prošeavtta siskkošin man birastahttet eanadagat, birrasat ja áiggit. Plur lea fievrridan dáidagiiddis miehtá Kárášjoga eanadaga gos son lea leamaš, ja govvidan daid Marvin Popeain ovttas. Čájáhusa tekstiilat faŋuhit olmmošlaš hámiid meaddel ja sisttisdollet maiddái vuollásaš tekstiila hástalusaid mat leat čadnon čavgadit ieš tekstilafiberiidda.
Pluras leat leamaš sierračájahusat ee. Hulias-gallerias (Oslos), Gyldenpris Kunstahallas (Bergenis), Tekstilindustrimuseas Salhusas (Salhusas), Vanntårnet gallerias (Nesoddenis) ja Søgne boares báhpagárdinis (Søgnes). Son lea oassálastan Høstutstillingen-čájáhussii (2021, 2022). Su dáidagiid leat oastán Našunálmusea Oslos (2019, 2024).
Kulturráđđi ja Kunstsentrene i Norge (KiN) lea ruhtadan čájáhusa.
Sámediggeráđđi Elisabeth Erke rahpá čájáhusa.
