Luondu, eanadat lea sin oktasaš. Ja nu maiddái gaskaoapmi: Čáhppes-vilges fotografiija ja video. Dasto mannet dáiddalaš miellaguottut iešguhtet bálgásis: Sonja Siltala suollemas ja leikošeaddji fotografiijat main olbmot sierranas vugiiguin šaddet lunddolaš oassin Finnmárkku eanadahkii. Ja Sigfrid Hernesa vuohki govvidit Rávttošvuomi luonddu sihke ávgadassan ja fuolalaččat dárkilis lagašvuođain.
Geasi čájáhusas mii lea Sámi dáláš dáidaga guovddáža stuorra galleriijas, eanadat lea fáddá. Duot guokte dáiddárvuođa – Sigfrid Hernes ja Sonja Siltala – oažžuba stuorra ja rikkis ovdanbuktima dán čájáhusas. Soai atniba goappašagat davvinorgalaš luonddu vuolggasadjin bargguskka ja dáidageaskka guovdilis fáddadahkan. Luonddu lagašvuohta skandinávialaš dáidagis lea erenoamáš ollu ovdan. Ja dieđusge lea stuorra dáiddalaš hástalus loaiddastit dán suorgái ja nagadit dan riggudit ođđa beliiguin ja áicagiiguin.
Aiddo dákko dat Siltala ja Hernes guovttos vuigŋeba ja doalvvuheaba iežaska guovttelágan muhto dovddiidahtti ja mihtilmas šuokŋadásiide ja dovdamušgerddiide. Goappašagat buktiba ovdan goabbáige dovdomearkkalaš čielga ja dárkilit geavahuvvon estetihka.
Sonja Siltalas leat dákko sierramielalaš ja dávjá vilddasvuođa čájeheaddji fotografiijat. Dáiddáris lea dihtolágan jurdda das mo ávdnet olbmo ja eanadaga, rupmaša ja luonddu, erenoamáš ovttasdoaibmama. Olmmoš ceaggá muohttagis vulosoivviid, olmmoš áddestallá geađggi, ovdamearkka dihtii, álo dainna áigumušain, ahte dát visot galgá njuolga govviduvvot ja ihtit govvan mii suohtastahttá ja imaštahttá.
Ja dás lea Sigfrid Hernesa erenoamáš gudnečájeheapmi lundui, ja su iežas dovdolagaš ja árvvas bovdehus searvat hárvásit dovdodievas luondduvásáhussii maid govat, fotografiijat, dolvvodit mielddiset. Muhto seammás Hernes iskkada ođđa bálgáid, iešguđetlágan dovddahemiid deaivvadettiinis luondduin. Video-filmmas maid son lea váldán Rávttošvuomis, omd., son atná sihke fotográfalaš ja kartográfalaš vugiid vai sáhttá geahčadit ja govvidit luonddu.
