Ođđa čájáhusat rahppojit 24.01.

Sámi Dáiddaguovddáš lea gidden uvssaid dan botta go cegget ođđa čájáhusaid.
Buresboahtin ođđa čájáhusjahkái ja guovtti ođđa čájáhusrahpamii duorastaga 24.01. dii. 18.00.

Aase Texmon Rygh – Agálašvuođa hápmi
SDG čájeha searválaga Nasjonalmuseet for kunst, design og arkitektur ja RiddoDuottarMuseat čájáhusa Agálašvuođa hápmi. Aase Texmon Rygh (r. 1925, Divrrátis Romssas), lea máŋggaid almmolaš čiŋahemiid dahkan Norggas, ja ovtta dain, «Spatiale» lea son 1965s hábmen ja ceggin Kárášjoga mánáidskuvlla šilljui. Čájáhusas čájehuvvojit baccit iešguđet hámis ja materiálas, ja oassi mii dokumentere teknihkaid ja su dáiddárvuođa, sihke teavsttaid, govaid ja filmma bokte.

Bácciid áigi #1
Dáiddárat čájáhusas: Jovn’Ovllá – Jon Ole Andersen, Folke Fjällström, Aage Gaup, Annelise Josefsen, Per Isak Juuso, Iver Jåks, Håvard Larsen, Max Lundström, Randi Marainen, Margrethe Pettersen, Maj-Lis Skaltje ja Ingunn Utsi. Kuráhtor: Kristoffer Dolmen.

Čájáhusas guorahallojuvvo muorrageavaheapmi váldomateriálan bácciin ja objeavttain. Dat árbevirolaš materiálageavaheapmi sihke dáidagis ja duojis lea erenoamáš mearkkašahti Sámis. Dát čájáhus lea dat vuosttasoassi dan golmmaoasát čájáhusaráiddus mii čalmmustahtá sámedáiddáriid bargovugiid, 3-dimenšunála dáiddabargguid, objeavttaid, bácciid ja instalašuvnnaid bokte. Dáidagat čájáhusas leat luoikkahuvvon RDM-Sámi Dáiddamagasiinnas. Dat golbma čájáhusa čájehuvvojit buohtalaga Aase Texmon Rygh modernisttalaš báccečájáhusain.