The Lost One

Čájeheaddji: Liselotte Wajstedt.

“The Lost One” installašuvnnain gaskkusta Liselotte Wajstedt eatnibeale áhkus historjá. Dat lea muitalus ráhkis čižžeáhku ja su nuppásteaddji eallima birra. Barggadettiin fuomáša Wajstedt ođđa čanastagaid bearašhistorjjás, čanastagat mat guoskkahit sihke sámi historjjá ja olbmuidgaskasaš gažaldagaid. Dáidda oktiičatná boares ja ođđa beliid ja gaskkusta daid njálmmálaš dovduičuohcci muitalussan, filmmain, govain ja gávttiin.

 

Liselotte Wajstedt guorahallá persovnnalaš muitalusa ja čanastagaid iežas eallimii. Muitalus, man dáiddár ieš muitala jietnabáddái, lea iežas ráhkus áhku ja su nuppásteaddji eallima birra. Vaikko gulai lestadialaš oskkolaččaide ja ahte sáhtii vásihit sosiála cuiggodemiid de son guđii buori náittosdili ja ovttas eallit eará dievdduin. Liselotte vuolggasaddji leat iežas mánnávuođamuittut, mat iđihit eará ja vajálduvvon muittuid. Rávisolmmožin son ipmirdišgoahtá oktavuođaid maid son ovdal ii obage leat jurddašan.

Filmmas čadnojuvvojit bearašgovat oktii luonddugovaiguin. Dasa lea Hanna Nutti bidjan musihka, maŋŋil go son lea dulkon muitalusa teakstan ja musihkkan. Filmmas goarru Liselotte vilges gávtti áhkkui juste dainna goarrunmašiinnain man son áhkus lei ožžon. Gákteláđđái lea son deaddilan áhku govaid. Gákti čájehuvvo čájáhusas, ovttas govain mii čájeha Liselotte gávttiin badjelasas. Elle Máret Valkeapää lea hábmen gáktečiŋaid.

 

Liselotte Wajstedt (r.1973) orru ja bargá Gironis, ruoŧabeale sámis. Su filmmat lea dávjá juoga mii lea gaskal dokumentára ja eksperimentála dáiddafilmma.