Jan Eirik Evjen – Visuála jurdagat

Bures boahtin čájáhusrahpamii «Visuála jurdagat» lávvardaga skábmamánu 10. beaivvi dii. 18:00. Čájáhusas govdilastet báccit, muhto sisdollui gullet maiddái govat. Fáddá čájáhusas lea mytologiija, symbolat ja olbmo gaskavuohta lundui.

Jan Eirik Evjen čájeha bácciid iešguđet sturrodagas ja materiálas. Báccit leat dahkkon ruovddis, muoras ja geađggis. Lassin čájáhusas beasat maiddái oaidnit govaid iešguđetlágan teknihkaiguin ja ávdnasiiguin, earret eará čitnatevnnegiid, deaddileamit báhppárii, relieffat ja govat maiguin motiivvat leat faskojuvvon pláhtaide. Evjen lea earenoamážit dán čájáhussii ceggen ođđa bácci mii lea ráhkaduvvon varas soahkemuoras, vižžojuvvon vuovddis Kárášjogas. Bácci lea heivehan dáiddaguovddáža olggobeallai ja masa čuovgadáiddár Kurt Hermansen lea bidjan čuovgga.

Jan Eirik Evjen (r. 1957) ássá Troandimis ja sus lea bargolatnja Lademoen kunstnerverksteder (dáiddárbájit) (LKV), mii lea 38 dáiddára oktasaš dáiddárovttadat. Evjenis lea dáiddároahppu Kunstakademiet i Trondheim (Troanddima Dáiddaakademiijas) (1973 – 78), ja viidásatoahppu ovddeš Norges tekniske høgskole (Norgga teknihkalaš allaskuvllas) (1982 – 83). Evjen lea oahpuid maŋŋil leamašan aktivvalaš dáiddárin ja oassálastán moanat joavkočájáhusain,  juryválljejuvvon jahkečájáhusain (čakčačájáhusain, riikkaoasse čájáhusain) ja sus leamašan sierračájáhusat. Son lea maiddái čiŋahan visttiid ja olgobirrasiid Trøndelágas, ea. ea. Ila skole, Vikåsen oppvekstsenter, Luftkrigsskolen ja Innherred sykehus. Evjen lea áŋgirussan ovddideame Troandima dáiddalávdin, ja LKV ja Babel visningsrom ásaheamit duođaštit dan. Sus leamašan maiddái olu eará luohttámušdoaimmat, gaskkustan- ja oahpahusbarggut.