Buresboahtin girjealmmuheapmai LUONDDUADJÁGASAT vuossárgga skábmamánu 5. beaivvi diibmu 18:30!
Dáiddár Synnøve Persen lea juo 40 jagi iskkadan ja guorahallan ivnniid giela ja poesiija musihka. Girjjistis «Luondduadjágasat – Dreamscapes» (“Drømmelandskap” dárogillii) muitala Máhte-Dánela Odd Máhte Susanne/Susanne Hætta Synnøve Persena ivnniid, eallima áigodagaid, reflekšuvnnaid, priváhta eallima ja málagovaid ja divttaid šaddama birra.
Sámi Dáiddagovddážis besset geahččit lávket Synnøve Persena eanadahkii ja muosáhit oasážiid girjjis. Persen lohká maiddái divttaid ođđaseamos girjjistis «Ruoná rieggá vuol váccašit — Under grønn ring vandre». Dan maŋŋil lea ságastallan – girjji, dáiddára ja dan proseassa birra mas girji šattai duohtan. Dasto maŋŋelis lea girjevuovdin, ja Hætta guovttos Perseniin čálliiba namaideaskka girjjiide.
Govvadáiddár ja poehta Synnøve Persen lea Beavgohpis Porsáŋggus eret ja son lea okta Sámi dovdoseamos dáiddáriin, maiddái internašuvnnalaš dásis. Son lei mielde Sámi dáiddajoavkkus Mázes 1978-83 ja lea čiŋahan ja herven olu almmolaš visttiid ja lea leamašan mielde olu čájáhusain, earret eará Documenta 2017:s. Persen lea almmuhan olu girjjiid sámegillii, ja mat leat jorgaluvvon eará gielaide. Guokte su girjjiin leat evttohuvvon Davviriikkaid Ráđi girjjálašvuođa bálkkašupmái. Su ođđaseamos diktačoakkáldat lea «Ruoná rieggá vuol váccašit — Under grønn ring vandre» (2017).
Susanne Hætta, govvideaddji, girječálli ja dáiddár, lea Álttás eret. Son lea almmuhan govvagirjji «Mari Moments — Mari Liibbat» Mari Boine birra (2017), «Utsi — veien ut av det kriminelle livet» (2015) ja «Okta beaivi Ánniin» (2000). Dáiddárin lea son oassálastán máŋggaid čájáhusain, earret eará OCA čájáhusas «Let the river flow» Oslos 2018:s.
