Espen Sommer Eide: Giellamuitu

Espen Sommer Eide filbma Giellamuitu lea Nuortalašgiela interaktiiva ja audiovisuála giellavuorká.
Nuortalašgillii báimmaduvvojit sánit ovttaid mielde guldaleaddjái, ja dát dáiddalašbargu hástala du, gii guldalat, váldit vára daid sániin.

Nuortalašgiella lea okta daid uhkiduvvon gielain máilmmis. Otne hállet dušše gaskal 300 ja 400 olbmo nuortalašgiela Suomas ja Ruoššas. Norggas dát giella ii šat hállojuvvo.

Espen Sommer Eide Giellamuitu lea ealli giellavuorká mii hástala daid einnostemiid mat oaivvildit nuortalašgiela oalát jávkamin. Giellavuorkkás gártet leat duppalmearkkašumit, ahte go giela čohkke, ja bidja dan vuorkái, de lea ráhkkaneamin dasa ahte giella jávká boahtteáiggis. Don gii leat guldaleaddji oaččot sániid main galggat vára váldit boahtteáigái.
Go guldaleaddji deaivvada Giellamuittuin, de šaddá son maiddái nuortalašgiela ealli giellavuorkán.

Gielleamuitu lea bistevaš instalašuvdnan Nuortasámi museas, Njávdámis.

Espen Sommer Eide (riegádan 1972) lea musihkkár, komponista ja dáiddár gii ássá Bergenis.
Su musihkkaprošeavttat Alog (ovttas Dag-Are Haugan:iin) ja Phonophani leamašan ovddimusaid searvvis eksperimentála elektruvnnalaš musihkasuorggis norggas.
Eide seaguha iežas konsearttain alladássálaččat elektralaš ja akustihkalaš čuojanasaid. Dáiddárin bargá son dávjá jienaiguin ja musihkaguin main leat giella, historjá, dieđalaš- ja filosofiijafáttát. Eide lea maiddái Verdensteatret teahter- ja dáiddárkollektiivvas miellahtun.

Filbma čájehuvvo buohtalagaid Sissel M Bergha sierračájáhusain Okside rïhpesieh .