Leatgo mii dás áin?

Čájeheaddjit: Helle Storvik, Rune Johansen, Mari Boine, Åslaug Krokann Berg.

Rahpandoaluin lea logaldalli Johan Borgos ja konsearta Mari Boine, Irene Persen, Per Erland Persen.

Prošeakta lea hybrida gaskal dáidaga ja dutkama, mii gaskkusta dehálaš oasi sámi/norgga historjjás, mii máŋgasiidda lea leamašan čihkosis.

 

Rávis olmmožin fuomášii Helle Storvik ahte sus lei sámi gullevašvuohta ja das vulggii sávaldat ahte ráhkadit prošeavtta mii galggai oainnusindahkat dán meastá oalát vajálduvvon, muhto dađi dehálat oasi min oktasaš historjjálaš ja kultuvrralaš árbbis. Persovnnalaš muitalusat identitehta, čearddalašvuođa ja kultuvrra birra dagaha máŋggarattat jienas oktasaš historjjá birra.

Mari Boine konsearttaš videoduođaštemiid bakte jagi 2010:s, gos geahččit bovdejuvvojedje ságastallat historjjáid ja vásáhusaid birra iežaset sámi duogážis, sáhkkehallamat olbmuid ruovttuin, ja mátkkoštit báikkiide gos gávdnojit duktásajit ja sámi kultuvrralaš luottat, duođaštuvvojit ja seailluhuvvojit muitalusat ja jurdagat dan birra movt lei eallin dakkár kultuvrras mii dalle adnojuvvui heahpadin ja doalahuvvui nu garra čihkosis ahte measta jur oalát jávkaduvvui, ja nu sáhttá sámi árbi seailluhuvvot boahttevaš buolvvaide.

Vuolggasadji lea báikkálaš ja konkrehtalaš sajáiduhttin, muhto barggu bakte čájeha prošeakta ahte dát čielgasit maiddái guoskkaha oppamáilmmálaš ja dábálaš čuolbmabeliid; identitehta, gullevašvuođa, ja sávaldat ahte dohkkehuvvot nu movt son lea, indiviidan ja searvevuođas. Dát lea maiddái sáhka fápmodássádagas ja definerenfámus, go son guhte lea vealahuvvon lea ieš mielde ásaheames hierarkiija. Riiddut maid mii dovdat buot servodatstruktuvrrain, ja mat čielgasit leat áigeguovdilat dálá servodatdigaštallamis.