All the Ones that Speak the Language Minus 30.

Čájeheaddji: Elina Juopperi.

Elina Juopperi čájeha riggehaga All the Ones that Speak the Language Minus 30, mii lea muitodáidda ja su anárašgiela gudnejahttin.

Sullii 300 dáláš olbmo máhttet anárašgiela, unna olmmošjovkkoš mii čájeha dán gielaža máilmmis ollu gielaid searvvis mii ii soaitte ceavzit guhkibut go moadde buolvva vel. Elina Juopperia prošeavtta, All the Ones that Speak the Language Minus 30, ulbmil lea nu bures go vejolaš duođaštit ja čájehit anárašgiela dáláš eallindilálašvuođaid.

 

Riggehahkii “All the Ones that Speak the Language Minus 30” gullet 245 fotografiija main Juopperi lea govvidan mealgadii buot dáláš olbmuid guđet hállet anárašgiela. 30 olbmo guđet adnojuvvojit leat anársámit, biehttaledje searvamis govvidanprošektii, dahje eai lean deaivamis. Riggehahkii gullet maid báddemat ja jearahallamat maid Juopperi lea čađahan sierranas báikkiin Anáris.

Anárašgiella lea sámegiella mii gullá suoma-ugralaš giellabearrašii, mii fas bealistis lea oassi urálalaš giellajoavkkus. Anárašgiela hállet dattetge duššefal Anára gielddas Suomas. Odne dat giella lea eanemusat áitojuvvon sámegielain, ee. dannego anárašsámi bearrašat hállagohte suomagiela árabut go eará sámi joavkkut. Giella geavahuvvo dušše Suomas, ja sii guđet dan giela hálddašit, máhttet maiddái suomagielage.

Giella lea kultuvrra ja identitehta vuođđu. Jos giella duššá, de jávká maiddái ovtta álbmoga kultuvra ja eallinvuohki. Mo galget anárašgielalaččat lihkostuvvat oahpahit gielaset ođđa buolvvaide?

 

Buohtalagaid prošeavttain “All the Ones that Speak the Language Minus 30” čájehuvvojit Andreas Gedina barggut “Chinese Whispers”.