Don munin

Horisonttaid viiddideapmi eaktuda álo gulahallama nuppiin.
Geat mii leat? Gos mii boahtit? Gosa johtit? Dát jearaldagat leat leamaš Don munin -čájáhusa gáldun. Čájáhus guorahallá min sorjavašvuođa guđet guimmiineamet, go áiggošeimmet vástidit dahje vuođuštit dáid gažaldagaid. Don munin -čájáhus lea vuosttažettiin beroštuvvan olbmuid deaivvademiin, min deaivvademiin. “Lean válljen deattuhit min ovttaláganvuođaid, eanet go min sierraláganvuođaid” dadjá kuráhtor Mariangela Mendez. Don munin čájáhussii servet golbmanuppelohkái dáiddára Kanádas, Colombias, Guatemalas, Mexicos, Norggas, Ruoŧas ja USA:s. Dat lea Sámi dáiddaguovddáža vuosttaš stuorra čájáhus, mas lea máilmmiviidosaš álgoálbmotoaidninsadji.

Mii lea vuođđun min identitehttii ovttaskas olmmožin, ja joavkun? Mo dat šaddá? Mii lea amas, mii lea nubbi? Mo don ja mun deaivvadetne, mii ja sii? Sáhkkiivuohta movttiidahttá deaivvadit. Muhtumin mii ballat apmasis ja hukset muvrraid iežamet suodjin. Muhto mii sáhttit válljet rabasvuođa ja sáhkkiivuođa láidesteaddjin, ja diehtit ahte juohke deaivvadeapmi rievdada, juohke deaivvadeami boađusin mii sáhttit oažžut juoidá nuppis, nu ahte “mii” šaddat “sin” láhkai.

Dakkár jearaldagat leat inspireren kuráhtor Mariangela Mendeza, gii lea čohkken čájáhusa Don munin, masa servet golbmanuppelohkái dáiddára, geain eatnašat gullet iežaset riikkaid álgoálbmogiidda. Dáiddárat bohtet Kanádas, Colombias, Guatemalas, Mexicos, Norggas, Ruoŧas ja USA:s ja sin dáidagat ovdanbuktet juoga láhkai olbmuid deaivvadeami, kultuvrraidgaskasašvuođa ja máŋggageardásaš identiteahtaid, gielaid, vuoigatvuođa iežas duogážii ja boahtteáigái, goappatbealat sorjavašvuođa ja kultuvrraid rievdama. Dálá dáidda lea girjái ja hástala beroštit iešguđetlágan videoid, dáiddadujiid, installašuvnnaid ja eará ovdanbuktinvugiid bokte.

Čájáhussii servet dáiddárat Benvenuto Chavajay, Nicolás Consuegra, Carola Grahn, Ana González, Dylan Miner, Sandra Monterroso, Delcy Morelos, Joar Nango, Mattias Olofsson, Edinson Quiñones, Liliana Sánchez, Pablo Sigg ja Eduardo Soriano.

Čájáhus lágiduvvo ovttasbarggus Havremagasinetiin, mii lea Bodenis, Ruoŧas, gos čájáhus lea ovdal čájehuvvon.

Eanet dieđuid čájáhusa birra oaččut Jan-Erik Lundströmas, Sámi Dáiddaguovddážis, +47 94138797, post@samidaiddaguovddas.no