Čájet Ivnni- Vuostálastte, Čuožžil, Ovddit!

Čájet Ivnni: Vuostálastte, Čuožžil, Ovddit boahtá dál Sámi dáiddaguovddážii, Kárášjohkii. Čájet Ivnni dáiddaprošeakta johtá, ja čájehuvvui vuosttaš háve guovvamánus Tråante 2017 ávvuvahkus, Troandimis. Prošeavttas leat čájáhusat, performánssat, akšuvnnat, lohkamat ja eará. Čájet Ivnni -prošektii dáhttot ain fárrui ođđa dáiddáriid, geat dáidagiinniset čalmmustahttet áigeguovdilis áššiid, ja geat guorahallet dáidaga politihkalaš bávkalanfámu.

 

Bajilčála, Čájet ivnni, lea ožžon inspirašuvnna Synnøve Persena njuohtanprošeavttas Gii ballá?  Das ođđa stuorra, monokroma, njuohtamat, deaivvadit dáiddára legendáralaš leavggain, maid son ráhkadii 70-logus akšuvnnaid ja vuostálastima várás. Geir Tore Holma dáidagat Čájet Ivnni -čájáhusas suokkardallet jahkodagaid, birrasa ja gullevašvuođa dihto báikái. Sus maid lea čájáhusas leavga. Mii oaidnit Suohpanterrora ođđa kolláša Ellos Deatnu– lihkadusa ja Finnmárkku biras- ja eananaktivismma doarjjan. Alege fal masse Anders Sunna dáiddaakšuvnna skábmačuovgan.

 

Čájet Ivnni fállá máŋggabealat prográmma. Synnøve Persen lohká divttaid, Geir Tore Holm loaiddasta spoken word performánssain ja Marita Isobel Solbergas lea performánsa. Dasa lassin lea Sámi Girl Ganga pop up -buvda rabas miehtá čájáhusáigodaga.